"Nvmbøng mvrūmè møt rà kvt vgám lv'm shárà we (12) dāng"

Dèni lvngchà nvng singwe Shvngkà taq "Nvmbøng mvrūmè møt rà kvt vgám lv'm shárà we(12) dāng" tiqdòngce dvshàng nø dvtit dvlélvm íe.

"Nvmbøng mvrūmè møt rà kvt vgám lv'm shárà we dāng"(12) ciq taq kèní dvtit dvlé nø dvshvng mvyøng we taq nø,

(1) Døngku Vsvng shvngbè svng dvkvm ràe. Tiqdø vlún ràe. (2) mvding mvman we shvngkà svng kv'm mv-daq. (3) nvmbøng mvrūmè møt wē dang nvng singdø paqzizì we, dvkvm we mvdøng mv-daq Vchvk we shvngkàrì svng rvtø vbóng dø shálúnshìlvm rvt radio dìngman we Shvngkàrì svng ètáò. (4) Nønt svng dìngdø ègvlshì. (5) Vchvk nø vpø vtvng we zaqshøprì, gwalvm bēlaq laqtunrì svng vtì mvgòng we pvlāstik yungkok taq záng ràe. (6) nvmbøng mvrūmè møtlù:ng rvtø taq nvmbøng wàrvt svmi sømrirì dvt nø vjásháò rvt gvzà svrè dvke è. Wervt nvmbøng mvrūmè wà lòng kvt chøm vtvnglap kaq svng léshì mv-daq . Vdèí àngwa elàngò we hpone, computerrì svng zàngwà nar ràe. (7) nvmbøng mvrūmè gòngrà dvgvp pvyúngtai dègáò nìnø svrè dvke we yàwet (%) luqrvt dvtmi wā làng ràe. (8) nvmbøng mvrū møt rà kvt letzitsvmi nø svrèdvke we írvt letzit nvng singwe dvrērì kaq svng gvzà mà-chvk nìnø mèpoqnì. Svmi pvtlakrì svng èbitò.

(9) nvmbøng mvrūmøt rà kvt svmi jvkrì svng zømshì nø làng we wá mv-daq. Bøn daq nìnø vrum vcar yv'ng èvl. (10) Ngvngwe vrvngshaq chøm shvràrì taq èvl. Mán pvdínbókrì nvng vcar dø èvl. (11) letzit nvng singdø nàí mècing mèralò nìnø vjà we, dvt we svmi sømrirì svng vwawa dø mvzømlvm vyáshì ràe. (12) vngàq we shøngtøngrì mvdvmø vhapwe svmi sømrirì svng èyv'ngo nìnø cing àng we letzit ròngdvp svng cāncān dvtá ràe. Vhú-vhwà Vwawa dø zømshì we bvttut wá mv-daq, wanø paqzizì we internet Shvngkà taq kèní tiqdvtvng dvtit dvlé ngò we íē.