Nøngmaq nø kámnøt taq vjúrøt dvzaq shàì we nvng cip shàì we nøt taqkèní ngànshà pèsvng dánglún nìe

Nøngmaq nø kámnøt taq vjúrøt dvzaq shàì we nvng cip shàì we nøt taqkèní ngànshà pèsvng dánglún nìe

 Vle vmì we lvbán ni taq Svrabín koqkámpè Francis taq kèní Gvray shànshvr karu nø yani 40 ni la vm-aq vnatshì nø vjúrøt dvzaqshì lvm tvrà svng kadø tvnùng yàngà we dang vtàn bøà. Vm-aq vnatshì we nvmlat lvbán taq rø vdu we Gvray dvbùshvng mòngkà Marko lèga taq shvnshvŕ pvlàcèí yesu svng zishèr tøm svng shølò we dang, yesu nø we zishèr tømø 40 ni 40 yaq vm-aq vnatshì nø ngàshà pèò dvløt gvzàmwe svng vhømò e wae.

We zishèr tømò àng gømla nø vsvng rìò dòngnøt mvsøn taq Gvray nø kàshøn we svng vjúrøt shìwe taqkèní vtánā lúnwe shvrà íe wae. Ínì gø we shvrà taq yesu nvng ngànshàpè gvsat we dang wáshì bøì we shvrà yesu wurgáng tvrà tiqlòng ni íráì. We tvra taqni yesu nø gvray shènshér pvlàcè ò tvrà shøl we vdòng taq àng tiqgóng svng zíshì bøì we íe.

Svrabín koqkámpè taqkèní gø yesuò chutcháng we tvrà svng ngàshà pèsvng vgámwe, cáng dvchøp we rì taqkèní lùngò we, záyàng dvbangā we nvng mvrà vroqā we bvnlìrì taqkèní shvbóng nø vtànò we íe. Lòngzà pè yesu svng tvpmò nø shvt bøà we taq ngàshà pènø jór nvngòn lúnò dø lánshì we ínìgø làngdøm taq yesu àngò chutcháng we jór nvngon nø wurgáng tvrà taq shìlòng svng dánglúnò nø shvngbe svng chutcháng lúnòwe íe.

Svrabín koqkámpè ígø we dø dvløt gvzàmwe dangrì svng síngsháì we nø nøngmaqî ngànshàpè svng jórlún lvm kùngà rì lúnì we svng síngshá dvzvŕ we íe. Nøngmaq í dvciq lvpat kàngé we, krvtcøm lvm svng bøn dvzvŕ we ngàshà pè nøngmaq shvnvng taq vlwe svng dømsháì nø àngdè tiqgóng svng vyá shìwe, gvsat we dang wálún lvm dvgø shì ràwe svng shvdøm we íe.

Kàngpè yesu nø kadvgvp gø cáng ngàshà pènvng vzøm we, vtoq vtip we mv vl, kadvgvp gø gvray mùngkà taqkèní gvsat yàngà we wa íe. Wedø ni Gvray àng jejú taq nøng maq svng kámnøt kèní vjú røt shìwe nvng mvrà taqkèní vwángshì we nø ngàshà pè svng dáng lún we tvrà íwe svng dvkám shaq íe. Svrabín koqkámpè Francis taqkèní làngdøm ku nvngòn ziwe mòngka taq nøngmaq shvngbe nø tìløp kámshàì nø nvmlat nvmpvng mvrà svng dvshér shì lúnbø shàwe rat we tvràò dvtú we tvrà taqni dí laqlúnì wanø nvngòn ziwe taq nvr bøà we íe.