Shvla we vyv̀ng roqshú pè Yesu Kristu í nøngmaq svng ègo ìe

Shvla we vyv̀ng roqshú pè Yesu Kristu í nøngmaq svng ègo ìe

Svrabín koqkámpè Francis taqkèní "Good Shepherd" wawe Yesu Kristu nø kadvgvp gø mvbe we shóngnøt kèní nøngmaq kaq svng èshò:ngì wervt àngò gø̀nshaq zíshì høqshaq shóngshì we tvrà svng vrá shvdǿm we íe. Nøngmaq nø Gvray gvsvng kaq svng tvpní shì lúnlv́m nvng vdè tiqgóng kaq svng we shvla we vyv̀ng roqshúpè í shvgùn shvring we vhǿm lv́m dvpvt rvt vjúrøt dvzaq shìràwe tvrà svng gø shvdǿm nø nònggwòn ziwe íe.

Shvlawe vyv̀ng roqshú nø àngò vyv̀ngré rì dvpvt àngò gø̀nshaq svng zíshì we høqshaq shóngshì we døni Yesu Kristu ànggø nøngmaq dvpvt àngò gø̀nshaq svng zíshì nø̀ shìwe høqshaq shóngshì nø mvbe, màtang we shóngnøt kèní èshòngì we dang shvdǿm we íe.

Shvlawe vyv̀ng roqshú ínø àngò vyv̀ngré svng shvngbe tiqgo vrv̀m kaq sháò we ínø̀ tiqgocè vmvngvm we ínìgø wego svng yv́ng høq lá dvzaqshì we íe. Vyv̀ngré rì àngmaqò shø̀mløm lv́m dvpvt àngmaq nvng tiqdø vyv́ng yaqdø̀ng rvtø̀ vrvm tiqdø vl we dang shvdǿm we íe. Kàngpè Yesu nø nøngmaq dvpvt àngò tiqlvpat svng zíshì we mvtaq nøngmaq tiqgǿ vrv̀m svng gø èroq èrim ìwe, èsháì wervt tiqgǿ gǿ tvrà vmv̀mvm wekvt vrá vwánglún lv́mrvt àngí èláì nø dvciq lvpat gø̀nshaq svng èzíì we dang Svrabín koqkámpè Francis taqkèní shvdǿm wegø íe.

Yesu Kristu nø vyv̀ng roqshú shvlárì shvngbe ò àngkàngpè íwe dang nvng jø̀ng jǿng ni àngò gø̀nshaq svng gø zíshì we shìyv́ng kèní vrá zun lú:ngì pè gø íe. Pàwálv́m wani àng nøngmaq kaqsvng shóngshì nø̀ nøngmaq vdè góng vdè mvyv́ng lúnshì we dòngnøt rì svng gø àngí yv́nglún síngshá lúnò pè gø íe.

Nøngmaq tiqgǿ vrv̀m taq vdè tiqgǿò cúnshàì we lvpat tvrà kèní tiqdá vsv̀ngrì taqkèní vdè kaq svng kadø dvdut rawe dang svng wa nøt vyuq we dang shvdøm we íe. Ínìgø Yesu Kristu àng ínø̀ nøngmaq svng àngdvpvt kadvgvp gø vpǿring we nvng kø̀mzøp we ku èroì we dang shvdǿm we íe. Yadang svng nøngmaq taqkèní vjúrøt shàì we, àngkaq svng noqngø̀mì we tvrà, àngkaq svng dvgùng shvringwe nvng chvpdvp taqgø Gvray kaq svng tvpní shàì we taqkèní cv́n dvgømì we ínìnø nøngmaq ò lvpat tvrà taq mòngzø̀l nø kø̀mzøp we shvmv́n jejúrì svng vtoshì lúnlv́m íwe dang shvdǿm we íe.