Vdè góng vdè dvrá shvdøk shìwe nø vdè dvpvt mòngzø̀lwe tvrà svng téwa shvzvtā lúnwe tvrà gø íe

Vdè góng vdè dvrá shvdøk shìwe nø vdè dvpvt mòngzø̀lwe tvrà svng téwa shvzvtā lúnwe tvrà gø íe

Svrabín koqkámpè Francis taqkèní dvtú we taq màshvla we bv̀nlì nvng mvrø̀ we bv̀nlì tvrà dang vdè góng vdè dvrá shvdøk shìrawe tvrà dang rì svng shvdǿm we taqkèní dvtú bǿà wegø ie.

Mòngzø̀l we tvrà nvng we tvrà taq nøngmaq kadø wa vzø̀m:ì we dang

Vdèò jàng laqyà rì wawe taq mòngzø̀l we tvrà svng vdu vbóng dø vrang shàì we nvng pv́nmv́n tvrà dang taq gø vdu vbóng dø wáshì nø cúnshàì we tvrà íe.

Wewa mvtaq vdè góng vdè dvrá shvdøk shàì we tvrà nø vdèò shvrúng nøt rì svng gø dvgùng vlwe dø shvrv́m shvrá shì nø vl lúnwe vsv̀ng gø ílonge.

Vdègóng vdè dvrá tvrà taq shvdøk shìnø vle wawe dang taq, lvpvt mòngzø̀l lv́m tvrà svng vrang shàì we tvrà taq dvzaq shàì we kù:ngà tiqlòng ni íwe dang vtàn bǿà wegø íe.

Vdè góng vdè dvrá shvdøk shìwe tvrà wawe taq tiqgǿ nvng tiqgǿ ò wálúnwe zìdang àng mvtú rì taq cv̀nnø vsháy we vl longe.

Vdu vbóng dø wálún we tvrà

Vsv̀ng tiqgǿ ò lvpvt taq shø̀nkà rì svng kadøwa shvrv́m shvrá shìràwe dang vdè ò tiqchø̀m vsv̀ngrì dvhø̀ nvng wángzà vsv̀ngrì dvhø̀ taq gv́l shàì we jàng laqyà rì wanø vshámvm we gø íe.

Àngmaq vdèò nøt mvsø̀n, jàng laqyà rì svng kadø pvranshì ràwe svng shvng shvng wa síngshá shìwe vsv̀ngrì gø íe wanø̀ shvdǿm we íe.

Vránø̀ vsv̀ngrì nvng vzø̀m vzvpnø̀ bv̀nlì wawe taqkèní gø shvlawe vjú rì vtoshì lún we mvtaq tiqdá vsv̀ngrì kaqgø dvsháza shóngnøt rì dvtanā lúnwe dang vtàn bǿà we íe.

vdègóng vdè dvrá shvdøk shìnø̀ vlwe vsv̀ngrì nø shíng íwe vjú rì svng gø vtoshì lún we dang shvdǿm we íe.

Ínìgø wedø vdè góng vdè dvrá shvdøk shìwe tvrà taq Gvray shvnshér kàru vdòng taq zǿm shìnø cv́n dvgøm lv́m nø mvdø̀ng vchvk we tvrà gø íe wae.

Svrabín koqkámpè Francis taqkèní vdè tiqgóng dvrá shvdøk shìwe tvrà nø vsv̀ng dvpvt shvla we lvpvt tvrà svng vrangā we nvng mòngzø̀l we tvrà svng vtoshì lún dvzv́r we dang shvdǿm nø nònggwòn ziwe gø íe.