Svrabín koqkámpè Francis taq kèní Myanmar móngdàn móng lvmang dvjà dvpat mòngzøl lòng lúnlvm vjú røt dvbangā we.

Svrabín koqkámpè Francis taq kèní Myanmar móngdàn móng lvmang dvjà dvpat mòngzøl lòng lúnlvm vjú røt dvbangā we.

      Svrabín koqkámpè Francis taq kèní Myanmar móngdàn móng dvjà dvpat mòngzøl lòng lúnlvm dvpat wanø vle á:mìwe lvpánni taq vjúrøt lìpùngmè svng wà bøà we íe. We vjú røt lìpùng taqnø Rome móng taq vlwe Myanmar móng vsvngrì nvng, shvngømrérì mvngushì nø wálún bøà we svnggø shálún shìe. Yadø vjú røt lìpùng mè svng wálún shì ráì wenø Rome móng taq vlwe Myanmar móng vsvng Catholic shvngømrérì taqkèní Svrabín koqkámpè kaq shún:ò we yáng kèní wálún bøà we íe. We vjú røt lìpùng taq Svrabín koqkámpè taqkèní tvnùngò wenø Myanmar móngdàn taq yanila bønwe móng lvmang dvjàrì íwe mà dvrádø āna tølò we, shvnip shvnvr we, móng vsvngrì kaq shvtwe rì dvhø kámnøt svng shvngáng shìlvm, vrvmwe kùngà taq vzøm lvm svng dvtú bøà. Yadø ngànshàpèí gvzàmwe vdòng tiqchøm vsvngrì dø shóngnøtí vzømlvm, jò we, døngmanwe tvrà taq rip lvm nvngòn ziwe íe. 

    Vránø yanø mà dvrá dø wawe vdòng taq dø màwá kámshìwe mvwàlvm, dvráwe tvrà taqkèní gvsatnø gvray dvbùshvng bvnlìrì taq gø zømshìlvm svng shvdøm we íe. Yesu kristuqnø nøngmaq shvngbe dvpat dvshá mvhøtlvmrì dvhø, nøtdat nøtcvm lvmrì dvhø taq vpè gvray kaq kadvgvp gø vjú røtā we svng shvdøm we taqkèní we lìpùng taq nvngòn ziwe mòngkà dvkang bøà we íe.