Nøngmaqí rø:tnìwe cvm vtang vjú røt tìyørì taq kèní vháng vtang bøn høq yesuí vlíng vpoā lúne wanø Svrabín koqkámpè Francis taq kèní dvkám we

Nøngmaqí rø:tnìwe cvm vtang vjú røt tìyørì taq kèní vháng vtang bøn høq yesuí vlíng vpoā lúne wanø Svrabín koqkámpè Francis taq kèní dvkám we

Nøngmaqí rø:tnìwe cvm vtang vjú røt tìyørì taq kèní vháng vtang bøn høq yesuí vlíng vpoā lúne. Zidòng pvngwà chàng nvng nga vshøm go svng vsvng 5000 rvzé gø svng shvvm lún yàngà we døni íe.

Nøngmaqínø ni vrvm yesuí nøngmaq dvpat kapà èlángā lúngì we svng røtshì vdu we íe. Yesuí nø nøngmaqò vjú røt kàrì, tiqdá vsvngrì kaq gvlshàì we dvsháza shóngnøt rì, nøngmaqò dvshà mvhøt lvm shìwvtrì svng àng kaq tvle ì we yáng kèní dang vrvm svng àngí dánglún lúngòe.

Yesuí nø nøngmaqí àng svng cvm vtangwe zíì we ínìgø àngínø té vtangwe nvng dàlvm dø íwerì dánglúnò we íe. Gvrayí nø tewe bvnlì rìsvng cvm vtangwe shóngnøt taqkèní shèrdø zíshì we yáng wàò we íe.

Yohan 6:5-11
Vsvng loksok Ang yv́ng svng di ráì we Yesuí yv̀ng bǿà nìnø, Filip svng, “Vsvng yadv́ngte v́mlv́m dvpvt, nøngmaqí kayv́ng kèní v́mpà wvnlv́m?” a:lòe 6 A:ngí yadø a:lò we nø, Filip svng vlø:tnò we wa íe. Kadø íe wani A:ngí kadø wàlv́m nø Ang sháshìe. 7 Wekvt Filipmí Ang svng vtà:ngò nø, “Nøngmaqí gv̀msùng vní yá denari* dvpǿ la wa:nì nìgø tamǿrcè gø vpvt nà mø̀í,” a:lòe. 8 Wekvt Ang coqcv́nrì kèní tiq pè í we, Simon Piter angnv̄m pè Anderuí ang svng, 9 “Zōngshār zidòng pungwà gø̀m nvng ngàcè vní go vdá we lvngàsvré tiq pè nø yayv́ngø vl we; ínìgø vsvng yadv́ngte luq dvhø̀ taq nø yarì pà shǿn tv́mshì má?” a:lòe. c 10 Yesuí, “Vsvng rì rúng dèzv́rnøng,” a:lòe. Wezàng nø shønlat mvme yoe. Wekvt angmaq rúng bǿì; lvngàré rì røbø̀ng nø pungwà kíng dv́ngte íe. 11 Wekvt Yesuí Zidòngrì lùò nø, Gvray kaq oqà wa dá:ngí, rúng bǿì rì svng túnaòe. Welòng dø ngārì gø angmaq shòng dv́ngte túnaòe.

Yadø dvsháza shóngnøtí yesuí vsvng loksokrì svng shvvm yàngà we nvng kámnøt shvngáng shì we dangrì svng síngsháìnø cvnshì vdu we íe. Cvm vtang gø dvpat tubùm dvbangā we dvsháza shóngnøt gvlshì lvm shvngøt dvtú we íe.

Yani la mònggvn taq gvzà nøt yùl lvmrà íwe rì svng yáng lúnshìe. Mònggvn taq ni vrvm vsvk 5 nøng làngpvng vsvng 7000 gø dángte nø vmaq dvkøqwe taq shí mvnshì we svng gùn dvtøp we rì taqkèní yánglún shì e. Yadø bønwe nø gvzà ni nøt mvshøm lvm tvrà íe. Nøngmaq gø vrvm taq dvsháza shóngnøt taqkèní mvkoknøt rì vsvng kaq vwánā lúnwe nøtrì gvlshì ràwe svng dvtú bøà we íe.