"Shøqdaqò we cvmré gø'vrvm nø Gvrayò jèjú kømpaq íe wanø Svrabinpè taqkèní shønò we shvngkà"

"Shøqdaqò we cvmré gø'vrvm nø Gvrayò jèjú kømpaq íe wanø Svrabinpè taqkèní shønò we shvngkà"

   Svmarérì svng shøn mvyøngè, namaq nø cvmrérì svng shøq nø yarvgaq yv'ng zunshì lúnlvm nønt shvløm ra èínøng nø Gvrayò té vtvng ìshøt rì èí nøngè. Yarvgaq svng tuqra we cvmrérì nø Gvrayò ìshøt igvn rì íe. Kadø íwe rvtø vdòng taq íni gø angmaq svng vtoshì ràe wànø svrabín koqkvmpè taqkèní nonggùn zi nø dvkvm we íe. Catholic shvngømré vdòng taq nø cvmrérì svng shøq mvnēshì we tvrà svng Ka dvgvp gø mà-toò we íe.

      Cvmré shøq mvnēshì rvt angpvnpvn taqkèní vgvmò we tvrà svng gø Catholic shvngømré kèní nø mà-toò we gø íe. Shà góng kèní mà-to nø mvshøqlvm bvnlì wàò tvrà vrvm nø Vsvng gønshaq svng shvtnò tvrà íe wanø shvngøt we tvrà vlē. Wervt Svrabin Koqkvmpè shøn we taq mongzøl we døngku ílvm dvpvt Vsvng tiqgø svng vtōò lòng nø Gvrayò shóngnønt íe. Svmi shvzøngshì we svmaré nvng lvngare nø Gvrayò shóngnønt svng svkse wáshì we gø íe. Vsvng tiqgø cvmré tiqgø svng vtōò we bvnlì nø kàm we rvzvngcerìò vpø vtvng tvrà tiqlòng gø íe. Døngku vdòng angpè angmèmaqò shóngnønt nø cvmrérì Pàmvràce shøqò gvlò sorí vnvp we døngku tiqlong í høq shvzøng we bvnlì gø íe.

    Vrá nø angpè angmèmaqò shóngnønt nø Gvrayò shóngnønt svng dvtvnò we gø íe. Gvrayí nø Cvmré vrvm svng zunshì lúnlvm dvpvt cāò nø vtōò we gø íe wanø Svrabinpè í shønò we Shvngkà svng tálúnshì we gø íe. Yà Mongkà svng Shvngømré vdòng døngku lìpòng rì Gvray shóngshì we tvrà taqkèní zunshì lúnlvm dvmvnò we (Amorits Reding ship) shóngnønt dvbù mongkà wàwe lega svng mvtúò nø shvngøt we svng shálún shìe. Shvngbe svng oqā.