Vsvngrì kaq vpø shvring we mvwáshì vsvng nø vsvng laqyà mvvl we íe

Vsvngrì kaq vpø shvring we mvwáshì vsvng nø vsvng laqyà mvvl we íe

Svrabín koqkámpè Francis nø yàmbvn bvn vsvngrì kaq tubùm dvbangā we mvdò svng poqpvng yàngà we 70 nøng gøm bøì we àngni dvpat dvbù nø vtowe kàru shvlang bøà we íe.

Àngshøn we taq mònggvn taq yàmbvn bvn vsvngrì àngkíng àngmùn gø vlwe ínì gø àngmaq svng rvwìngwe, yáng mvtàmvnwe wàò vsvngrì gvzà vlwe svng nøt mvbyo lvm yánglún shìe. Wedø yàmbvn vsvngrì nø nvmvm dvtè tiqpvn ku mvnyamvmò we tvrà rìgø yánglún shìe.

Mònggvn yàmbvn vsvngrì kaq tubùm dvbangā we mvdò IOM nø Jvniva myuq taq vlwe tiq mvdò ínø Svrabín koqkámpè Francis gø we mvdò dvpat 10 nøng høqshaq bvnlì wá dvzaqshì yàngì we íe. We Svrabín koqkámpè Francis ò tvnùng kàru taq wedø yàmbvn vsvngrì kaq dang àngpvn pvn ku mvnyamvmwe pàwá wáshìe má?

Vsvng tiqgø ò dvgùng svng pàti mvlan we tvrà wá vléshì wenø kadøwa móngdàn tiq móngdàn svng vháng vlún dø wálún lvm ílonge má? Cvm vtang vsvngrì ò dvgùng svng vpø we mvvl we dángtenø kadøgø vsvng laqyà zángshìe wanø shøn mvlún shìlong. Yadø yvmban tvrà nø àngmaqò cúnshìwe lvpat tvrà rì téwa vhángnø shømløm lvm tvrà svng lashì we yvngkèní bøn vdu rawe íe.

Wedø yvmban vsvngrì ò bvnchvtrì nø àngmaq nvng wa singwe møí. Nøngmaq tiqgø vrvm nvnggø singwe ni íe. Nøngmaq shvngbe nvng vsvng mvngpòng mvdòrì dvhø taqgø vtøp sháò we íe. Àngmaq shvngbe gø vsvngrì wani íwe svng síngshá vdue.

Àngmaqò lvpat tvràrì svng ètáā nøng, àngmaq nvng chøm vsvngrì kaq tubùm dvbangā we bvnlì èwànøng. Yalòng nø svngpvn dvsháza shóngnøt bvnlì, vdu vbóng we dvrá nvng tiqchøm vsvngrì ò shóngnøt svng dvtanā we íe.

Dèni battaq dvshà mvhøt we vsvngrì kaq vnáāì werì yánglún shìe. Tubùm dvbangā lvm tvle àngmaqsvng vnáì we laq mvwáshàì. Vsvng tiqgø ò dvgùng nvng vdu vbóng dø wáshì lvm dvkáng shàì.
 
Vsvng shvngbe nø tiqnøt tiq mvyùng wáshì we tvrà svng tóng dvzaq shàì. Yvmban vsvngrì àngmaqgø gønshaq zangwe vsvngrì wa íe. Yalòng svng síngsháì nø àngmaq svng roqgvr lvm, vto lvm laq mànáì wanø Svrabín koqkámpè Francis taq kèní dvkám nø tvnùng vtnà we íe.