Kù:ngà vnønwe vsvngrì kaq roqgvrā ì

Kù:ngà vnønwe vsvngrì kaq roqgvrā ì
            
Catholic shvngømré dvrá svrarì kaq svng dvgá rvtø rì kèní téwa kù:ngà vnønwe vsvngrì ò vko vkángrì kaqsvng dvhángā lúnlvm dvkám we íe. Vsvngrì vdòng taq tvsvng màrvwìng weí vzømwe dø yángshì longwe ínìgø chvpdap bvnlì taq vko vkángrì, vmíng vkángrì dvhø tvsvng rvwìngwe vl we gø íe.

Svrabín koqkámpè Francis taq kèní dvkám we taq téwa yvmban bvnlì wàngcèrì, shagóng shiqshàn we dang vnøn we vsvngrì, shini mvshøqò we cvmré góngcèrì, shìlvm dø íwe vsvngrì dvpat tvnùng ò nø dvkám we íe.

Pàwálvm wani mvdàm kaq shønshì bøì we vsvngrì ò vko vkángrì kaq yáng mvtvmvm we, rvwìngwe bvnlì rì vmvng nø  vdu vbóng we dvrá vdòng taq cúnshì lúnlvm dvkám nø nvngòn ziwe íe.
       
Àngmaq ò lún vkángrì svng vpø shvringā nø roqgvrā we nø nøngmaq svng vsvng jøng jøng tiqgø bøn dvzvŕ we tvrà gø íe. Wedø mø:í nìnø nøngmaq í màdvrá we tvrà svng tóngā we bøn dvzvŕ sháò we svng shvdøm we íe.
 
Wedø íratnø kù:ngà vnønwe vsvngrì kaq tubùm dvbangā we dvrá nø móng øpshøl we vsúyaqrì í dvtú we ku mø:í nø dvrá vjì rì taqkèní tvrà tònglvm vchyak we íe.
 
Yalòng nø Catholic sasvnà ò dvrá vjì rì taqkèní wálún we vko vkángrì tiqlòng gø íe. Wedø ínø wa dvrá vjì rì taqkèní àngnvm àngchvngrì shóngnøt svng dvtanā lúnlvm ílonge.

We tvrà taqkèní mø:í nìnø vsvng tiqgø kaq Gvray í dvkám shaq íwe àngò lvjøm svng shvtìn, gvyaqshì we bøn dvzvŕ sháò we dang Svrabín koqkámpè Francis taq kèní dvkám we íe.