Gvray à:ngò dvsháza shóngnøt nø vsvng shvngbe kaq chutcháng lvm dvpat íe

Gvray à:ngò dvsháza shóngnøt nø vsvng shvngbe kaq chutcháng lvm dvpat íe.

Svrabín koqkámpè Francis shønwe taq gvray à:ngò mvbe we dvsháza shóngnøt taqkèní shvngbe svng chutcháng lú:ngòe. 

April 3 ni shìwà vsvngrì loksok rì kaq Svrabín koqkámpè Francis taq kèní gvray à:ngò dvsháza shóngnøt dang rvtø vrvm shvkse wáshì lvm dvkám we íe.

Svrabín koqkámpè Francis nø gvray ò dvciq lvpvt mvrà chutāwe shóngnøt nø lvpvt àngshvr wáshì we vsvngrì dvpat kadvgvp gø vko vkáng tiqlòng íwe nvng gvray nø nøngmaq svng chutcháng lvm kadvgvp ínìgø shóngnøt èzíì we svng vtàn bøà we íe.

Yalòng nø Kàngpè Yesu Kristu ni íe. À:ngò mvrà chutchángā shóngnøt svng nøngmaqí vtoshì lú:nì dvgvp, gvray nø nøngmaq maq nvng tvpníshìe walòng svng síngshá lú:nì dvgvp nøngmaqí àngkaq jøng jøng ni shálú:nì we íe. Yalòng nø àng svng shálún lvm dvpat vtá:nā we íe.

Gvray dvpat nøngmaqò nøt mvsøn bá:ngkà tá:nā ìwe yvngkèní gvray í dalvm dø íwe bvnlì dvtanā we ínø àng kaq svng shálú:nìe.
 

Catholic shvngømré vdòng taq nø shvngømré vsvngrì kaq mvra vroqā we Sacramento wawe jejú gømla taqkèní mvrà chutā we jejú kaq svng shvrúngshú rìò wur yvngkèní vtoshì shvla we íe.

Catholic shvngømré kèní shvngøt dvtú we dvrá taq mvrà vroqā we Sacramento taqkèní døngmvnwe pvlàcè tvrà, gvray à:ngò àngcø àngcèrì wawe dvgùng svng vtoshì lúnwe mvtaq gvray nvng vzøm vzvp we tvra kaq èshølì wegø íe.

Svrabín koqkámpè Francis dvtut shønwe taq shvngømré vdòng taq à:ngò cvnshú shvlá bønlún lvm dvpat gvray í nøngmaq svng mvrà èchutāì wedø nøngmaq dvhø taq gø tasvng mvrà chutā kéì nø vrvm vrá lúnlvm gvray shóngshì we íe.