Gvray dvbùshv̀ng mòngkà kèní gálòng sv̀ng ziwe

Gvray dvbùshv̀ng mòngkà kèní gálòng sv̀ng ziwe

Svrabín koqkámpè Francis taqkèní dvkámwe taq yadø mònggv̀n taq mvrø̀we àngpv̀n pv̀n, mvjàn rì vkǿnrawe dvhø̀ mvhøtlv́m àngpv̀n pv̀nrì dvhø̀ taq dvshà mvhøt lv́m vhǿ:mò we vsv̀ngrì kaq gvray dvbùshv̀ng mòngkà kèní nøt shvlø̀mwe nø àngmaq kaqsv̀ng gálòng sv̀ng ziwe gø íe. Shvngø̀mré vsv̀ngrì shvngbe gø kàngpè Yesuò tvrà svng cv̀nlv́m døngjá vlwe dang welòngnø gálòng tvrà tiq tvrà ni íwe dang dvtúwe íe.

Wedø Gvray dvbùshvng mòngkà svng vtoshì lv́m yak we vsv̀ngrì dvpvt we mòngkà svng vríngāwe nø àngmaq kaqsv̀ng nøt shø̀ngran gálòng svng zíāwe gø íe wanø dvkám we íe.

Dènibat vsv̀ng mv̀ngpòng mvdòrì muqhǿm mvngushì nø mòngkà mvngushì we nø lvpvt cúnshìwe vsv̀ngrì dvpvt vchvk mvdø̀ng tiqlòng gø íe.

Wedø vsv̀ng àng mvdòrì nvng tiqdø vzø̀mnø vl sháò wenø àngnvm àngchangrì nøt mvsø̀n svng téwa shvzaqā we tvrà íwerat we tvrà taq dvzaq shìlv́m dvkámwe gø íe.

Nøngmaq v:lìwe mònggv̀n rvgaq yachàng svnggø mvkok vsùnglv́m gvzàni vchakwe íe. Nøngmaq v:lì we mònggv̀n rvgaq yachangnø nøngmaq vsak cúnshì lv́m dvpvt vchak mvdø̀ng tiqlòng ínìgø àngkaq svng nøngmaqí kapàgø wáā mvlú:nì we íe.

Nøngmaq shvngbe nø Gvray kaqsvng vwángshì nø dvzaqshì lv́m vchvkìe. Gvray kaqsvng nøngmaq shóngshàì wenø Kàngpè Yesu mèpvng cv̀nlv́m dvpvt shvngbe svng gur lú:nìwe shóngnøt tiqlòng gø íe.

Shvngø̀mré sasvna wawe shvrúngshú mvdò svng poqpv̀ng ráàwe St. Ugine nø nøngmaq shvngbe dvpvt sanbyaq vsv̀ng tiqgǿ ínø̀ àngyv́ngkèní cvnshì shvlawe laqyà mvtúrì gvzà vlwe dang gø dvkámwe íe. Àngnø Gvray dvbùshv̀ng mòngkà dvshvngwe tvrà taq vtangshaq nøtlø̀m nø dvzaq dvkángshì we vsvng tiqgǿ íwe taq dvshà vsvngrì svng gø laqni shóngshìwe tiqgǿ gø íe.

Gvray bv̀nlì taq nøtløq shìe. Gvray àngò shónøt svng sakse wáshì nø dvsha:ngòe. Nàmaq shvngbe gø St. Ugine døni cv́m vtang vsvngrì dvpvt tubùmāwe vsv̀ngrì Kàngpè Yesu ò sakse shvlá wáshì lúnwe vsv̀ngrì leqí dv́r:nø̀ng wanø nònggwòn ziwe gø íe.