Àngwà rvtø̀ kèní téwa dvzaq shàì

Àngwà rvtø̀ kèní téwa dvzaq shàì

Nøngmaq mvrà vlì we vsvngrì dvpvt shíkamshì bǿì we Yesu Kristu àngò laqyàrì svng cvnshàì nø̀ àng svng vrá dvzøm lv́m shvdǿmnø̀ nònggwòn ziwe gø íe. Vdèò shvnvng taq tvpníshì we rv̀mnvngrì kaq svng shóngnøt kèní vzø̀m vzvpnø̀, ngànshàpè svng gø shóngnøt dvtan lún ràwe dang shvdǿm nø nònggwòn ziwe íe.

Vdè kaqsvng shóngshì we vsv̀ngrì kaq vrá shóngnøt zíshìwe nø kagǿ taq ínìgø wáshì wewa íe. Vdèò rv̀mnvng rv̀mchvngrì nvng vzø̀m vzvpwe tvrà nø kagǿ taq ínìgø wáshìwe wa íe. Vdè taqkèní àngwà èwàò we tvrà mvdàm shíng íwe tvràrì svng gø wá lúnlv́m dvzaq shì ràlonge.

Kadøíwe tvrà rì svng téwa wá dvzaqshì vdue má? Wanø shvláwa dvdam dvtøpshì lv́m vchvke. Vdèí àngwà èwàò we tvrà kèní chá vle shíng íwe tvrà svng wá èlúnò wenø téwa shvlawe dang gø íe.

Gvray ínø kadvgvp ínìgø, kagǿ svng ínìgø tiqdvcháni rìn vrá shóngshì we ínø̀ we shóngnøt kaq svng nøngmaq shvngbe taqkèní vtoshàì nø nøngmaq shvngbe gø tasv̀ng vshòng kéràe. Téwa vdèò ngànshàpè svng gø vdè yv́ngkèní shóngnøt dvtanā lúnwe nø Gvray àngò dvgùng gùngshvng kaq svng dvbūngā we gø íe.

Gvrayí nø nøngmaq kaqsvng làngdø̀m àngni høqshaq èshòngì we íratnø̀ nøngmaqí gø àngkaq svng wedø ni làngdø̀m àngni høqshaq shóngshì ràwe gø íe. Nøngmaq tvrà vmv̀n lúngì dvgvp ínìgø, mvrà vle shàì we rvtø̀rì taq ínìgø nøngmaq kaqsvng àng shóngnøt èzíì we íe.

Nøngmaq svng shóngshìwe Yesu nø nøngmaq dvpvt wurgáng baqò we, dvshà mvhøt we nvng shìlòng svng vhǿm bǿà. Nøngmaq taqkèní àngkaq svng vrá shóngnøt mà dvtanì we, nøt vwáng shàì we mv-vl we ínìnø Yesu àngò shóngnøt kaq svng nøngmaq vdè dè íni vdǿn:ì we nvng vbóng vme.

Gvrayí nøngmaq kaqsvng èshòngì we shóngnøt nø kadvgvp gø mvbevm we shóngnøt kèní èshòngì we íe. Nøngmaq tasvng gø we shóngnøt kèní àngnvm àngchvngrì kaq, cv́m vtangwe vsv̀ngrì kaq nvng ngànshàpè kaq svng shóngnøt dvtānā lv́m wàì.

Mari kaqsvng Gvray àngí dvkámkàrì shvngbe mvdàm àngtaqkèní “Kàngpè nà kà døni laqí daq” wanø̀ cv́n dvgøm ráà wegø íe. Wedø nøt laqyàrì kaq svng cvnshàì nø cv́n dvgøm lv́m wàì. We tvrà svng cv́n dvgøm lúnlv́m dvpvt gø vjúrøt shàì wanø Svrabín koqkámpè Francis taqkèní shvngø̀mré kaqsvng dvtúnø vrìng bǿà wegø íe.