Synod lìpùngmè mòngzø̀l dø vdáng lúnlv́m dvpvt vjúrøt kùng taq shòlaqré paqzí vdè rì nvng Svrabín koqkámpè vhømnø̀ dvmv̀n we

Synod lìpùngmè mòngzø̀l dø vdáng lúnlv́m dvpvt vjúrøt kùng taq shòlaqré paqzí vdè rì nvng Svrabín koqkámpè vhømnø̀ dvmv̀n we

Synod lìpùngmè mòngzø̀l dø vdáng lúnlv́m dvpvt vjúrøt kùng svng September 30 ni St. Peter noqngø̀m tø̀m taqø wáshì bǿì.

Mònggv̀n móngdàn vrv̀m taq vlwe nøt lúmwe vsv̀ngrì kaqgø gonø̀ Svrabín koqkámpè Francis taqkèní vrìng bǿà we íe. We lvmvng tìyø taq vbá we Leticia Araujo nø Brazil móngdàn kèní íe. Àngnø 'Laudato Si' lvmv̀ng kèní vtoq vtip tvrà shølshú vgo gø íe.

Àngnø Vatican taq wáshì bǿì we toq vtip lv́m tvrà "Faith communication in the digital world: A Synodal perspective" tvyø 3 boq waboq taq vbá bǿì wegø íe.

Àngnø mònggv̀n døng taq vl we sv̀ngpv̀n vtoq vtip paqzí vdè rì íwe shòlaqré rì nvng vhøm lv́m dvpvt tìni America móng kèní Roma svng September shvlá vdòng tuq bǿì wegø íe. We lvmv̀ng tìyø taqnø Gvray dvbùshvng mòngkà dvshvng we nvng pv̀lv̀cè dang paqzí ziwe tvrà dang zìdang vhángwe paqzí kèní zìdang dvhàng lv́m dvpvt wáshì wegø íe.

Màbóngwe tóng laqyà rì svng dvtit tvle we

Synod vjúrøt kùng taq Vietnam móng, Saigon kèní gvsa tiqgǿ Saigon gø̀rwang kèní kàru dvzáng bv̀nlì taq dvzømshì we Tam Bui wa tǿshì we tiqgǿ taqkèní mòngkà taqkèní gø dvtit tvle nø dvshvt bǿà we íe.

Àng taqkèní 16 boq waboq Svrado gvbà rìò Synod lìpùngmè svng shv̀shér pvlàcè Gvray wur taq zíshì we tvrà nø vtang kèní shvla we tvrà íwe dang vtàn bǿà we íe.

Nigeria móng kèní shv̀ngkà dvshvng shú svra íwe Emmanuel Donatus taqkèní gø yadø Synod vjúrøt lìpùng mè nvng singnø̀ yadø vjúrøt kùng nø vtang kèní ring nø dvgùng vl we dang, shvngø̀mré vsvngrì tiqgǿ vrv̀m kaqsvng gø nøt mvsø̀n dvshvtā we tvrà íwe dang tvrà vrv̀m taq vrá dvdam dvtøp dvzv́rā we kàshvbóng vdè ò ni vrv̀m bv̀nlì rì svng shvla we tvrà kèní vháng dø wáshì lún we nvng døngmvn we tvrà svng zàn dvtut tvrà tóngá we íe wanø̀ vtàn bǿà.