Svrabín koqkámpè Francis taqkèní ngànshàpè nvng mvngushì we tvrà wá mvdaqwe dang dvkám we

Svrabín koqkámpè Francis taqkèní ngànshàpè nvng mvngushì we tvrà wá mvdaqwe dang dvkám we

Svrabín koqkámpè Francis taqkèní dvkámwe taq Adam nvng Ewaq ò shv̀nshér kàru taq yv́nglún shìwe dø ngànshàpè nvng vzø̀m vzvpwe tvrà nø kadangshì svre dvké we dang vtànò nø̀ shvdǿm wegø íe.
Ngànshàpè ò dvløt gvzàmwe tvrà kèní lutshì lúnlv́m wawe tvrà nø we ngànshàpè nvng mvngushì we mvwá shìlv́m nø mvdø̀ng ni vchvk we dang vtàn bǿà wegø íe.
Ngànshàpè àngnø vtang kèní mvgam màshvla we nøt vshøp pè ínø dvløt gvzàm pègø íe. Wervtnø̀ bvttut àng nvng vzø̀m we, mvngu shìwe tvrà mvwá shìlv́m, àngnø mvgam màshvla we bv̀nlì rì taq vtang kèní svre dvké pè gø íwe rvt mvrà dǿng svng dvjá lúnpè íwe dang dvkám wegø íe.

Nv̀mlat nv̀mpv́ng kàru taq vru shaq íwe ngànshàpè vbø̀ ò dang svng kadvg gø dvdam dvtøp shìlv́m dvkám wegø íe. Shv̀nshér kàru taq Adam nvng Ewaq nø Edin cún vdòngø ngànshàpè vbø̀ svng døngmvn pè íe lv́njà:ngà. Ínìgø ngànshàpè nø mvgam màshvla we bv̀nlì taq vtang kèní svre dvké nø vjønò pè íwe rvt ngàngò mv́r svng gø shøngshvng vmvtshì lúnpè gø íe.

Shvlawe, Màshvla we tvrà svng rvwvl shálún we shǿngshí tø̀ng svng màkoq lv́m wawe nø Gvray àngtaqkèní síngrv́l nøt rvwvl nøt rì lún màdvzv́r lv́mrvt vgám we møí. Bashà tiqgø taq v́l vduwe zìdang taq v̀l lv́m wawe wa íe. Wedøni nøngmaq tiqgǿ vrv̀m taq kadø íwe zitnøt rv́lnøt rì vshøpmì we ínìgø àng tiqzìdang cè taq wani íe walòng svng síngshá lún ràwe gø íe.

Wervt ngànø pàdang taqgø bǿnlún we vsv̀ng wanø nøtshì lv́m mv-vl, shádǿm, ídǿmshì we nøt nø màshvla we tvrà ò nv̀mlat mvpv́ng gø íe.
Gvrayí nø Adam nvng Ewaq svng we shǿngshì lòng ám mvdaq wanø vgámwe àng mvtú nø àngní nø shvngbe svng dánglúnò e wawe shádǿm shìwe nøt svng vgámā we wani íe. Àngní taqkèní shvlawe, màshvla we bv̀nlì rì shvngbe svng wálún shòe wawe nøt mvzángshì lv́m dvpvt wa íe.

Wedø íwe nøt mvsø̀n rì nø mvrà vdòng shì lòng svng tuq dvzv́r we ínø dèni bat høqshaq dvløt gvzàmwe tvrà svre dvké we tvrà rì kèní vkǿn ráì wegø íe.
Mvrà lòng nø bashàrì ò lvpat svng kàshaqmèí chérshì nø tuq rawe møí, we vsv̀ngrì ò dòngnøt taq cv̀mkèní vcaq shaq ínø témvnshì we íe.

Welòng taqkèní nøngmaq kaqsvng dvløt gvzàm nø mvrà dǿngsvng dèjá ìwe svng kadvgvp gø dvdamshì ràwe gø íe.
Wervtnø̀ ngàshàpèí dvløt gvzàm rawe rvtø̀ rì taq àngsvng vtoqshì lv́m wá mvdaq vdèò nøt mvsø̀n bángkàrì svng cøtshì we taqkèní we dvløt gvzàmwe tvrà svng gvsvt dánglún ràwe gø íe. Vdèò nøt mvsø̀n svng roqgvr shàì. Wedø wáshì wenø vdèò síngrv́l nøt zangwe gømla tiqlòng gø íe wanø dvkám nø shvdǿm we íe.