Nøngmaqò Pvlàcè mvjan taq jór lúnlvm dvpvt Gvray gvsangò shvmán jèjú nø tubùm dvbangè wànø Svrabyin Koqkvm shøn bø'ì Shvngkà.

Nøngmaqò Pvlàcè mvjan taq jór lúnlvm dvpvt Gvray gvsangò shvmán jèjú nø tubùm dvbangè wànø Svrabyin Koqkvm shøn bø'ì Shvngkà.

Svrabyin Koqkvm kèní nar vrvm Vsvng mvngpong nvng vhøm mv-ngúshì we taq shvla lòng nvng màshvla dø cúnshì tvrà (vices and virtues) nvng singdø shøn bø'ì. Vrá nø nøngmaq lvpat taq vhø'm v-du we Pvlàcè tvrà taqø yvk we dang rì svng ìshøt vtoshì we lvngcha ku wárà we vmìng vkang nøngmaq kaq zi lòng svng shøn bø'à we íē.

Svrabyin Koqkvmpè Francis í nø vle a:mì we Nár vshøm ni Vsvng mvngpong nvng vhøm nø v-toq v-tìp we taqø nøngmaqò Pvlàcè mvjan (spiritual combat) svng mvdøng gvl nø shvla lòng nvng màshvla lòng cúnshì ra dang (vieces and virtues) svng Kà vgo tiqlòng ku lu nø shvdøm taqsórí shøn bø'ì.

Svrabyin Koqkvmpè taqkèní nøngmaq rvzvngce lvpat taqø kàdvgvp gø " Yvklvm lòng mà hø'mshaq dvtut cúnshì we mø-í ni àngwa nvnnvn íwe lvpat" wàwe mà-vl. Wervt kàdvgvp gø dvzaq dvgvngshì nø dì ra we (continuous combat) dang svng shøn bø'à.

Nøngmaq rvzvngcerì nvmlat taq Tìløp só nvng Tìløp kámshà ìwè taq ngór màbá nìnø nøngmaq lvpat taqø Yvklvm lòng nø vhø'm ra lòng svng shvdøm weí dvkv'm nø shøn bø'ì.

Nøngmaq shvngømré rvzvngce àngshvr wáshì lvm dvpvt Tìløp (Baptism) vtoshì nø shvngømré rvzvngce wáshì lúnì nø nøngmaq lvpat taqø mvhøtlvm yvklvm lòng mà-vl a:mì we mø-í nø shangshang wace yv'ng dvzvr mvyø'è. (Christian is not spared from struggle)," nøngmaq cunshaì we mònggvn lvpat yalòng taq Vsvng vrvm ínø rvzaq lòng svng shvle lúnlvm dvpvt dvzaq dvgvngshì we nvng gun dvtøp ra lòng" svng shvdøm taqsórí shøn bø'ì.

Nøngmaq taqø dvløt gvzàm rì vhø'mì we irvt Gvray gvsangò shvmán jèjú nøngmaq taqø wálún lvm vmìng vkang zi we dang gø íe. Vrá Shànshér we vsvng Anthony gø " temptation mà-vl nìnø nøngmaq taqø chutchvng lòng gø lúnlvm mø-í" wànø shøn bø'ì.

Svrabyin Koqkvm ínø Dø vdòng taqwā vl bø'ì nø " àngdeò Mvra svng àngde íwā pvrvn we" rvzvngcerì nø shvla lòng nvng màshvla lòng svng rvwvn mvsháò rì íwe dang rì svng shøn bø'ì.

“ Nøngmaq shvngbe nø Mvra rvt dvshá dvre ísha nø vlíng vpo lúnlvm lòng svng ra vchvk rì wā í we dang svng shá lúnlvm dvpvt nvng Gvray gvsang yv'ngkèní shvmán jèjú ìshøt lòng svng vtolúnlvm dvpvt røtním shì ràe.Vrá nø àngò dvshá zā mvkok dvdí shóngnønt lòng nø nøngmaqò Mvra shvngbe taqø mvcv'n lòng íwe dang svng kàdvgvp gø Nønt mvsøn vdòng yv'ngø shá rà we dang "svng shøn bø'à.

Svrabyin Koqkvmpè Francis í nø Vkangpè Yesu Tìløp kámshì yvngì pàdø nøngmaq gø' Gvray gvsangò dvshá zā we shóngnønt svng mà shvre weí Tìløp lòng kámshì ra we dang svng shøn bø'à. Yesu Tìløp kámshì bø'ì mèpvng Satan nø dvløt gvzàm weí Vkangpè Yesu svng jisher tøm(desert) kaq svng shøl we vhø'm bø'à. Wervt Svrabyin Koqkvm kèní nøngmaq àngí vhø'm bø'à we mvbøn rì dø nøngmaqí vhø'm v-du ra dvgvp dvgø'shì lún ràe.
" Vrá lvpat wàwe nø shøngjóng kélvm dang rì, dvzaq dvgvngshì ra we dangrì, tvrà dvkaq rì, dvdvm shì taqsórí màbóng matok rì, mvyvngshì we dvløt gvzàm rì nvng lvpat nvng màzøm we shaqrì vwáshaq " vl rì svng shvdøm we íe.

Svrabyin Koqkvmpè Francis yv'ng nøngmaq shvngømré rvzvngce màbóng we dang dø í rì taq dí lúnlvm dvpvt dì lúnlvm rvt goè. " Vchā we Nønt mvsøn nø Cipshì lúnlvm dvpvt shvdøm goè.(pride challenges humility),
Shvmná vcor lòng nø tubùm dvbvng shì lúnlvm rvt goè.(hatred contrast charity), Dìngman we Pvlàcèò dvbù lòng nø Nønt yor lvm lòng íē.(sadness oppose the true joy of spirit), Nønt mvsøn zaq lòng nø dvshá zā Nønt mvsøn svng dvshér lúnè.

Nøngmaq cunshaì we tvrà rì svng (vices and virtue) vrá dvdvm vjáng taqsórí nøngmaq nø shvla lòng nvng màshvla lòngò dvhø' ø mvyv'ngshì we sømrì høng svng lé lúnshì we dang shøn bø'ì.

Vrá tiqkvt vnvn nø Svrabyin Koqkvmpè taqkèní shvla lòng nvng màshvla lòngò cúnshì we àng tvrà svng vrá gùndvtøp we taq nøngmaq rvzvngce ísha rvt cúnshì we pvnrì nvng màbóngì dang rì nø nøngmaq nø nøngmaq wā gùndvtøp shá íwe írvt nøngmaqò Nønt mvsøn svng Gvray gvsang yv'ngø tánshàì nø mvngsher we tvrà kaq dí lúnlvm dvpvt shøn bø'ì.

Svrabyin Koqkvmpè Francis taqkèní lvngdøm ku nøngmaqò 
(spiritual combat) Pvlàcè mvjan taq nøngmaqò lvpat taqø shvla lòng taqwā Pvlàcè gønshaq Vmpa zí lún we Gvray gvsang yv'ngkèní shvmán jèjú ìshøt rì svng vtoshì lúnì pàdø màshvla lòng svng gø tvling nø cúnshì lúnlvm dvpvt dvkv'm nø shøn bø'ì.