Nxnt Shvyvng shiwe keni Mongzxl lunshilvm

"Vrvm vrashi we tvra yvng nxnt shvyvngshi we nvng kvmshi we long vl rae. Pvwalvm wani, mongzxl wa we long nx, nxnt vlxmra we tvra mxvl keni nx, mvlunshi" wa nx Svrabin Francis i shxn noe. 

Mongzxl wa we long nx, tiniq tiqrvtx yvng cvncvn wa lunshi we long mxi we svng shalun shie. Vde Min Mongdvn vdong yvng, mvjvn gvsvt we tvra, madvra we tvra rvtnx (70) jvn nxnghxq mongzxl lunshilvm dvzaqshi we svng shalun shie.

Yadx mongzxl lunshilvm dvzaqshi we tvra yvng, tiqwvn nx gxnshaq dvbxmshi we ri gx vle. Tiqwvn nx, shvt vhxmo we tvra gx vle. Tiqwvn nx dvsha mvre vhxmo we vsvng ri gx vle. Yadx angpvn pvn dvzaqshi we ini gx dxngmvn we mongzxl long shini mvlunshi we long svng dvdvm lunshie.

Vsvng tiqgx nvng tiqgx vdong, Vsvng dvci tiqme nvng tiqme vdong yvng mongzxl lunshilvm dvzaqshi we rvtx, nxnt shvyvngshi we long nvng kvm vrvmra we tvra nx mvvl mvdaq we tvra ie. Kvm vrvmwe tvra, nxnt shvyvngshi we tvra mxvl we keni nx nxnt vlxmra we tvra gx mxvl. Nxnt vlxmra we tvra mxvl we keni nx mongzxl gx mvlunshi we nvng vbunge.

Mongzxl nx shvmvng mvdaq we tvra idx tiqdvcha, mongzxl lunshilvm dvpvt dvzaqshi we rvtx yvng, nxnt shvyvngshi we nvng kvm vrvmra we tvra svng shvmvng mvdaq we long ie.