Apnúngshì we lvpat nø mònggv̀n ò dvbùshvng bv̀nlì ni íe

Apnúngshì we lvpat nø mònggv̀n ò dvbùshvng bv̀nlì ni íe

Svrabín koqkámpè Francis dvtúwe taq nøngmaqí wàì we bv̀nlìrì shvngbe nø Gvray dvbùshvng mòngkà dvshvngwe bv̀nlì rì dvpvt wàì we ínø̀ vdè tiqgóng aqnúngshì we gø dvbùshvng bv̀nlì wawe íe. Weratnø̀ nàmaqò apnúngshì we bv̀nlìrì nø mònggv̀n dvpvt dvbùshvng bv̀nlì wawe ni íe wanø vtàn bǿà.

St. John Paul (II) nø 1994 nǿngtaq shvrúngshú rìnvng Synod lìpùngmè svng wà ráà. We rvtø̀ taqnø shvngø̀mré vdòng taq vtang kèní rvzaqwe rvtø̀ tiq rvtø̀gø íyv̀ngì. Pàwálv́m wani we rvtø̀ rìtaq Vocation wawe Gvray bv̀nlì walv́m dang tiq maq rvgaqrì taq nøt mvlúmwe rì vlwe rvtø̀ gø íe. Dèni rvtø̀ rì taq høqshaq wedø íwe vsv̀ngrì vlwe gø íe. Ínìgø wedø bv̀nlì tvràrì taq téwa nø jór nònggwòn rì lúnshì bǿì we svng gø yv́nglún shìe. Yadangrì shvngbe nø shvngø̀mré svng lóngdø̀ng mvdàm taq vrang shaq íwe rat gø íe.

Gvray àngò gømpaq, àngí ègoì we kà shaqrì tálúnì we, àngò mòngkàirì svng vtoshì lúnìwe nø Gvray àngdang svng shvkse wáshìì werat gø íe. Svrabín koqkámpè taqkèní Gvray dvbùshvng tvrà taq dvzaq dvkángshì we vsvngrì kaqsvng dvgùng shvringwe kà vtàn bǿà wegø íe. Àngshø̀nwe taq àngmaq nø kagǿ taqkèní gø dvdutò we mǿí, àngmaq vdè dè we tvrà svng rvcvngshì nø kámnøt tvrà taq ripwe vsvngrì ni íe.

Shv̀ngshér we vsvngrì ò apnúngshì we tvrànø dòngnøt mvsøn taqkèní gø vzømwe tvrà tiqlòng íe. Yadø íwe bv̀nlì taq dvzaqshì we shvrúngshú mvdò rì nø Gvray kaqsvng nv̀mbat tiq shvrà taq gv̀l:òe wawe mvdàm we àngmvdò rì kaqsvng rvtø̀ yvnggúng ngàngdøng lv́m tvràrì taq gø dvzaqshì we íe.

Gvray nvng vzø̀m:ì we vdòng taq àngò dvbùshvng mòngkà svng gø àngshí àngwvt shvlárì dvbung lv́m dvzaq shàì.

Shvngø̀mré tiqlòng svng vrangshì we vsv̀ngrì tiqmaq taq Gvray àngò dvzv́r shvlá wáshì lv́m wawe mvdàm vdèò dánglún we kùngà rì svng dvtan lv́m dvpvt wawe vsvngrì gø yv́nglún shìe. Àngmaq taqkèní wa pàdang svng gø shølnø øpkáng mvyǿwe í we shvngø̀mré taq vgo wáshìwe tiqmaq yv́ngshìe. Yadangrì nø Gvray dvbùshvng bv̀nlì wawe lvpat taq vyá shìràwe tvrà gø íe wanø dvkám we íe.