Catholic Svrado àngké mvdò ò (16) boq waboq Lìpùngmè nv̀mlat tut Svrabín koqkámpè Francis ò dvtú mòngkà

Catholic Svrado àngké mvdò ò (16) boq waboq Lìpùngmè nv̀mlat tut Svrabín koqkámpè Francis ò dvtú mòngkà

Vnvm vchvngrì,

Ya Lìpùngmè svng kø̀mngǿm ráshàwe shvngbe svng pàmvrà wange.

Svrabín koqkámpè St. John 6 nø "nv̀mløp móngrì taq shvngø̀mré tvrà taq tiqzaqlè tvrà svng dìì wawe nøt mvsø̀n rì vmv́ng lu:ngì" wanø̀ dvtú yv̀ngà. Wervtnø̀ àngtaqkèní Svrado àngké mvdò ò lìpùngmè svng wàlv́m dvgø̀ yv̀ngà. We mvdò ò shølwe tvrà vdòng taq shvngø̀mré lìpùngmè svng àngmanggá rì àngdang dang kèní wáshì ráì we íe.

Ínìgø tiqzaqlè tvrà svng dìlv́m wawe manggá taq shvngø̀mré mè nø dvgǿ ràwe dangrì vlwe íe. Nøngmaq ni yadø íwe shvngø̀mré lìpùngmè svng bv̀nlì àngkàng wáshàì we rvtø̀ mé zángnø̀ rvcà:ngìwe rvtø̀ taq lìpùngmè ò bv̀nlì àngkàng íwe Cardinal "kapà èwànø̀nge" wa røt lú:ngì. Àngnø Belgium móngò Sasvna shølshú tiqgǿ gø íe. Nøngmaq ígø àngsvng nvpni nø Mé záng lv́m dang dvgǿ shàìe wanø̀ vtàn bǿshà. Wekvt àngtaqkèní mvràwe nø yadang nvng singnø̀ Mé zángnø̀ rvcáng mvrà wenø wanø̀ vrá shø̀n ráì. Nøngmaqí gø àngsvng yalòng nø shvngbe vbá vduwe lìpùngmè mǿí má wa vtà:ngì "mvrà, mvrà yalòng svng Mé zángnø̀ màrvcà:ngò" wanø vrá vtànòe. Pàwálv́m wani nøngmaq vdè dè taqkèní we lìpùngmè taq shvng shvngwa vdè ò shǿn vtám mvyǿ we tvrà rì svng vtán lúnshìe walòng svng mvsíng shá yv̀ngì. Yadøni (60) nǿngrì vle ráì mèpvng nø shvngø̀mré lìpùngmè tvyørì nø téwa shvla we tvrà svng tvnù:ngvtnà nø tiqzaqlè tvrà svng shvngø̀mré kèní tiqdø dílúnlv́m wawe manggá kèní lìpùngmè svng wálún daqshà.

Yalòng nø yùl yùlcè í bø̀n ráì wenø mǿí. Shvlá vtang we tiqtvrà bø̀n ráì. mònggv̀n móngdàn vrv̀m kèní Svrado gvbà rì shvngbe gø yadø íwe lìpùngmè rì svng wàlv́m shvrúng nøt zangwewa íe. Amazon rvgaq zìdang vháng vlúnlv́m dvpvt wáshì yv̀ngì we shvngø̀mré lìpùngmè dángbǿà mèpvng gùn dvtøp we taq Svrado àngké mvdò rì taqkèní gv́lshì bǿì we 2 tut watut dvlà tiqlòng nø shvngø̀mré lìpùngmè, shvngbe nø tiqzaqlè tvrà svng dìlv́m wawe yalòng lìpùngmè bø̀n ráì. Nv̀mlat tut ò àng dvlà lòngnø Svrabín koqkámpè ò bv̀nlì mvtú rì dang ni íe. Vkvt wáshàì we lìpùngmè ò dvlàrì nø 2 tut watut ò dvlàrì taq kèní wáshì we íe. Mònggv̀n móngdàn vrv̀m kèní Svradò àngké mvdòrì tiqdø̀ tiqzaqlè tvrà svng mvngushì lv́m walòng nvng singnø̀ shvlawa dvtøp lv́m rà vchvk we lòng svng síngshá lúnìe. Pàwálv́m wani yadø shvngø̀mré lìpùngmè svng wàlv́m rvtø̀ tuqráì walòng svng Svradò àngké mvdò rì taqkèní gø síngshá shaq íbǿì wervt íe.

We manggá rì taq yalòng lìpùngmè svng wá vdu ráì. Shǿn mvyǿ we àngmvtú nø shvngø̀mré lìpùngmè wawe nø̀ vdè nvng tvpníshì we àngrì àngyv̀ng rì mvngushì nø̀ bv̀nchvtrì pvran lv́m, vdè ò nøt mvsø̀nrì svng vchàng lv́m dvpvt mǿí. Vnvm vchvngrì nøngmaq í síngrà we nø yalòng lìpùngmè svng shøl we shølshú vgo nø nøngmaq taqkèní mǿí, shv̀nshér pvlàcè Gvray íe walòng svng síngshá ràe. Nøngmaq kaq gálòng svng ezíì we Gvray nø nøngmaq vdòng taq vlbøwe kvt yalòng lìpùngmè nø mòngzø̀l dø jórlún lv́m wa ílonge. Wedø mǿí nø̀ nøngmaq vdè dè ò nøt mvsø̀n jànglaq yàrì kèní shǿn vchàng lúngì kvtnø yalòng lìpùngmè ò àngmvtú nø shvnglut we tvrà svng tuqlún lv́m mv-vl long. Shvngø̀mré lìpùngmè wawe nø shv̀nshér pvlàcè Gvray yv́ngkèní tvrà shøl we vdòng taq díràwe zaqlè tvrà tiqlòng gø íe. Yalòng lìpùngmè svng nv̀mlat poqpv́ngshì we tvyø taq vzàngkaq v̀l bǿì we shølshú rìò lvpkà, kàru shøp svng gø vtàn bǿà we íe. Welòng kàru rì taq shv̀nshér pvlàcè Gvray tvrà svng vtànò we kàru shøp tiqlòng gø íe. Pàwálv́m yalòng kàru svng vtánò we taq chvpdvp lvpat ò dvjà rì svng yv́nglún síngshá lún nø̀ tubùm dvbangā lúnlv́m dvpvt gø íe.

Mònggv̀n móngdàn vrv̀m kèní Svrado àngké mvdò rìò lìpùngmè wáshì ráì we 50 nǿnggøm àngni taq Gvray paqzí vdèrì taqkèní yadang rì svng dvtøp nø̀ wur mv́r shvmvr shìwe kàru shøp svng gø gv̀l bǿà we íe. Dèni bat taq we tvrà svng cvnnø̀ cv́n dvgøm lv́mgø vchvk bǿì.

Shvngø̀mré ò bv̀nlìrì tvrà vrv̀m taq shv̀nshér pvlàcè Gvray nø tvrà shølā we íe. Àngò jejú ìshøt taqkèní wa bashà rì chutcháng we jejú svng vtoshì lúnì e. Kàngpè Gvray nø shølshú wáshì we Gvray ni íe. Yadang svng nøngmaq í mvsíng sháì we ínìnø nøngmaq shvngbe nø dvzv́r rìò kàru taqkèní "shv̀nshér pvlàcè Gvray svng nàto shìnø̀nge má? shv̀nshér pvlàcè Gvray vle walòng svng nøngmaq í vzàngkaq táyv̀ng shàmá? shv̀shér pvlàcè Gvray tvrà svng nøngmaq í mvtá yv̀ngì wanø vzìngwe vsv̀ngrì nvng vbóng lú:ngìe. Nøngmaq shvngbe í shv̀shér pvlàcè Gvray nø shvngø̀mré svng tvrà shøl nø̀ bv̀nlì wawe íe walòng svng shvng shvng wa síngshá ràlonge.

Shv̀nshér pvlàcè Gvray nø àngdang dang kèní bv̀nlì wawe ínìgø ngàngdøng we tvrà tiqlòng íwe shvngø̀mré vdòng shvngø̀mré vsv̀ngrì dvpvt shvngøt dvtú shaq íe. Welòng nø Pentecost bóy àngni taq bø̀nyv̀ngì we bv̀nchvt tiqlòng døni íe. Pentecost bóy àngni nv̀mlvt dung taq shvngbe nø pàmvrà cè ínø̀ mèpvng dung taq nø tasv̀ng vzi vrùng wawe nvng vdè dè dvcì kàrì kèní vrùng we bø̀n yv̀ngì. Ínìgø shv̀shér pvlàcè Gvray dvgùngò tvrà kèní shvzømā lúnò we svng vtoshì lún yv̀ngà. Welòng nø vzø̀m vzvpwe tvrà mǿí nìgø vrám vráwe tvrà svng tuqlún wegø íe. Kàngpè Gvray ínø shvngbe kaqsvng tiqdang tiqtvrà kuwa èwáāì we mǿí nø̀ tiqgǿ nvng tiqgǿ nø màbóngwe tvrà kèní tasv̀ng shvrám shvrá shìlv́m èmv́nā ráshà. Nøngmaq dvhø̀ taq vrám vráwe tvrà mv-vl we ínìnø shv̀shér pvlàcè Gvray mvzáng shì wervt ni ílonge. Yalong nø nøngmaq vdòngø Gvray bv̀nlì wawe tvrà rì íe.

Shv̀shér pvlàcè Gvray nø bashàrì ò mvshǿl taq shvrám shvráā we Gvray gø íe. Yadang nvng singnø̀ nøngmaq í síngshá ràwe nø vrám vráe wawe nø tiqnøt tiqmvyùng wáshì we mǿí nø̀ màbóngwe tvrà kèní v́llún we tvrà íe.

Yalòng lìpùngmè dángvm we rvtø̀ taq màbóngwe tvrà rì mv-vl nø shvngbe nø tiqnøt tiqmvyùng kèní nøt vrá kàciq gv́l lúnwe la ínìnø shv̀nshér pvlàcè Gvray vbá we lìpùngmè mǿívm.

Shv̀shér pvlàcè Gvray nø màbóng we tvrà svng tiqlòng dø wa dvkǿmā we mǿí nø̀ vdu vbóng dø shvrám shvrá shì lúnwe tvrà svng mv́mā we íe.

Shvngø̀mré mè nø shv̀shér pvlàcè Gvray ò wurtaq luqtàm we kàshaqrì dvhø̀ tiqdø vdu vbóng dø vlwe àngmvdò gvbà tiqlòng íe. Nøngmaq shvngbe í shvngø̀mré mè svng wedø síngshá ràlonge. Shvngø̀mré shvrà, gø̀wrwang tiqlòng nvng tiqlòng dvhø̀, shvngø̀mré vsv̀ngrì tiqgǿ nvng tiqgǿ dvhø̀ màbóngwe tvrà rì vl longe. Wedø màbóngwe tvràrì dvhø̀ taq shvngbe nø vdu vbóngwe tvrà kèní shvrám shvrá shìnø v́l lúnlv́m dvgǿā nø̀ tvrà shøl we nø̀ shv̀nshér pvlàcè Gvray ni íe. We dø wálún lv́m dvpvt nø nøngmaq bashàrì kùngà taqkèní wá mvlúnshì long.

Shvngø̀mré vdòng taq vdu vbóngdø vrám vránø̀ dílún lv́m wawe nø shv̀nshér pvlàcè Gvray taqkèní wa bǿn lúne. Wervtnø̀ nøngmaq ò shvla we vjú dang taqwa vzø̀m vzvp we mǿí nø̀ vhǿm shìrawe shìwvtrì taq gø tiqdø ripā kelún lv́m dvkám we íe. Màbóng we tvrà rvtnø̀ nøngmaq rvwìng kéì wedø mǿí nø̀ vdu vbóng we tvrà taqkèní shvrám shvrá shìlv́m vchvke.

Shv̀nshér pvlàcè Gvray nø nøngmaq ò wur rì svng èzø̀mì nø̀ nøt shvlø̀m we Gvray íe. Shv̀nshér pvlàcè Gvray vlwe nø nøngmaq shvngbe ò àngmè tiqgǿ dø shømløm we tvrà íe. Gvray àngnø nøngmaq kaq svng tvrà èshøl ì we, nøt shvlø̀m we íe. Nøngmaq mvdàm shv̀shér pvlàcè Gvray ò bv̀nlì wawe tvrà nø nøngmaq kaqsvng dvmyaq rì wur kèní gø shèlutnì nø̀ nàcù:ngìe.

Luka 10:34-35

Ang yv́ng tvp di nø ang dvmmá rì taq zanlún yøtì nvng bìmtì vdø̄:rò dá:ngí døpmāòe. Vrá, wepè svng ang lozè go taq shvrú:ngò nø, zaqlè chø̀m tiq chø̀m svng shøl bǿà nø ang svng dvzø̄:mòe.

Mèpvng ni taq ang búng dvgvp, ang gv̀msùng vnílvp shà:lò nø, chø̀m angkàng pè svng zíò sórí yadø a:lòe ‘Yapè svng nàcún dáò, yamvdv̀mø nàò kadv́ngte èbéāvm nìgø, ngà vtv́ng rāng dvgvp nà svng ngàí tvlelv́m íe,’ vl ráà.

wanø̀ yv́nglún shìe.

Shvngø̀mré kaqsvng shvzvtā we gø shv̀nshér pvlàcè Gvray ni íe. Yadang nvng singnø̀ Gvray shv̀nshér kàru nvng vzø̀m we tvrà vle. Shv̀nshér pvlàcè Gvray nøt yòr we dang svng Gvray shv̀nshér kàru taq nvng darì mvshǿl rì taq yv́nglún shìe. Shv̀nshér pvlàcè Gvray nøt yòre wawe taq vjú mv-vl we kàrì èshø̀n we íe.  Shv̀nshér pvlàcè Gvray kaqsvng nøt yòr dvzv́r we kàrì wawe taq vjú mv-vl we kàrì, màshvla we kàrì, tasv̀ng yitkewe kàrì íe.

Yadø íwe laqyàrì nø nøngmaq vdòng taq vkǿn we íe. We dang nvng singnø̀ Epesus 4:30 taq

Vrá, chutchv́ng daq ni høq dvpvt namaq svng tip èdip bǿshà pè Gvray Ang Shanshér Pvlàcè svng nøt dvshá mèdèzv́rnøngni. wanø yv́nglún shìe. Nøngmaq tiqgǿ vrv̀m taq wedø íwe jàng laqyà rì dvshér shìlv́m shv̀nshér pvlàcè Gvray kaq bángkà mètánā ò we ínìnø tiq zaqlè tvrà svng tiqdø dìlv́m wawe nø yvk longe. Yadangrì nvng singnø yadø svrado àngké mvdò rìnvng Synod lìpùngmè wá vdu ráì we íe. Ya lìpùngmè taqnø dang vrv̀m taq shvng shvng wa vtan kelv́m ílonge.

Vrá nø yalòng lìpùng mè nø Lutdaw lìpùng mǿí we svng síngshá ràlonge. Vdèò lìpùngmè taq vdèò shvngø̀mré gwø̀rwang vdòng taq jø̀ng jǿngni wá ràwe tvrà rì svng vchv̀ngnø̀ vrashì we lìpùng tiqlòng íe.

Yalòng lìpùngmè taq rvgaq tvrà rì mvdàm pvlàcè dang téwa táā lúnlv́m dvgǿ shàì. Shvngø̀mré vdòng taq zø̀nlì dvjáng tiqlòng dø vkǿnwe nø we rvgaq tvrà ni íe. Vdèò pvlàcè tvrà mvdàm rvgaq tvrà svng cv̀nwe mèwáshì nøngni. Rvgaq tvrà rì taqkèní lvpat mvkrǿm mvdøprì lúnshì we ínìgø welòng mvdàm téwa pvlàcè tvrà nø mvdø̀ng ni íe. Shvngø̀mré vdòng taq pvlàcè Gvray nvng tiqdø v́l lúnlv́m dvzaq shàì wanø̀ dvkám we íe.

Svrado rì tiqmaq taq shvngkà tvnúngshú rì nvng dvmv̀n we mvwáshì wanø̀ tálún shìe. Wedø gø mǿí long. Wedø shvngkà tvnúngshú rì ò bv̀nlì gø gvzà ni vjú zinø̀ vchvk we íe. Pvlàcè Gvray nvng tiq zaqlè tvrà svng diwe dang àngmaq taqkèní tvnùng lúnlv́m nøngmaq í dvbangā ràlonge.

Vdè taqkèní èshø̀n we mvdàm tiqdá vsv̀ngrì ò kàshaq rì svng táā lún ràlonge. Yadangrì nvng singnø̀ vsv̀ng shvngbeí síngshá lúnlv́m dvpvt Media rì ígø dvbangshì lv́m røtním shì mvyǿnge.

Chø̀m dø̀ngku rì nvng singnø̀ ya lìpùngmè taq dø̀ngku vkang bøwe vsv̀ngrì Scramento (zidòng mok) vtoshì lúnlv́m vkáng vl longe wanø̀ vsv̀ngrì tiqmaq dvdam shìwe vle. Yalòng nø̀ rvgaq tvrà wani íe. Wedø íwe shìwvt rì dvhø̀ taq yalòng lìpùngmè svng wápv̀ng ráshà. Amazon shvngø̀mré lìpùngmè taqgø dø̀ngku vlwe lvngàré rì svng shvrúngshú vya kámā lúnshì longe wanø lánshì we vl yv̀ngì. Wedang nvng sing nø̀gø shúnò we gvzà vl ráì. Wedø íwe bv̀nchvt rì dvhø̀ taq wálún shì ráì we íe.

Vkvt boqò lìpùngmè taqgø kadø íwe bv̀nchvt vl longwe svng mvsháshì, Svmaré rì taqkèní shvrúngshú vya svng røt shì rawe gø vl longe. Svrado rìò bv̀nlì tvrà rìnvng singnø̀ gø shúnshì rawe dang rì gvzà vl longe. Wedø írvt Media rì kaq svng ngà røtshì mvyǿng wenø vsv̀ng tiqmaq taq vko vkángrì røtshì rawe vl longe ínìgø  vdè ò bv̀nlì døngjá svng chvpdvp wá dvzaqshì lv́m, rvwìng we tvrà mv-vl dø shv̀ngkà rì svng døngmvn dø tvnùng lv́m vchvk longe. Wedø ínø̀wa shvngø̀mré vsv̀ngrì taqkèní síngshá lún lú:ngòe. Yadang nø gvzàni vchvk we íe. Vsv̀ng shvngbe í shálún høq èwà nøng.

Shvngø̀mré taqkèní yadø rvtø̀ lúnshì we dvhø̀ yadø mvngu shàì we lìpùngmè taq dèbang shàwe svng gø oqà wàìe. Kàngpè Yesu nø wurgáng mvdàmø shíkamshì bǿì mèpvng àngni taq dvzv́r rì shvngbe nø zø̀mwacè vl yv̀ngì wedø nøngmaq gø wedø wáshàì e. Dvzv́r rìnø àngmaqò svre nøt rvt zø̀m wa vlyv̀ngì we ínìgø nøngmaq nø tiqgǿ nvng tiqgǿ táā kelv́m dvpvt zø̀mì we íe.

Nàmaq shvngbe ò dvzaq dvkángshì we kù:ngà rìrvt dvtut èwà nøngwe bv̀nlì rvt oqà íe wanø̀ dvtú bǿà we íe.

#PopeMassages