Christmasò kø̀mzøpwe døngmvn tvrà svng tiqkvt vrá lálv́m wàì

Christmasò kø̀mzøpwe døngmvn tvrà svng tiqkvt vrá lálv́m wàì

Gvray àngnvng vhøm lv́m dvpvt nø àng vlwe ka shvrà taq ínìgø tuqhøq dvzaqshì lv́m wàì. Yesu Kristu àng tuqlongnø̀ nìnà kung taq gv̀l yv̀ngà wedø nøngmaq tiqgǿ vrv̀m gø vdè góng svng cipshìwe nøt mvsø̀n kèní cúnshì ràwe íe.

Svrabín koqkámpè taqkèní vle bǿìwe lvbán Vatican taq wàlv́m íwe lòngzàpè Yesu ò chø̀m svng vrang lv́m dvpvt ràwe dvrèrì svng ālu zíshì bǿì we Italy móngdàn kèní Sutrio, Rosello nvng Gwadi mala kèní tuqráì we krønmvn gvsa 3 gǿ nvng gø vhømnø dvmvnwe wáshì bǿìwe gø íe. Àngmaq taqkèní Christmas shǿngtø̀ng nvng lòngzàpè Yesu ò chø̀m svng ālu zíshì bǿì wegø íe.

Wedø lòngzàpè Yesu ò chø̀m svng St. Peter noqngø̀m tø̀m taq shvngngø̀mré vsvngrì í noqngø̀m lúnlv́m dvpvt nvng dvgá tiqchø̀m svng nø Svrabín koqkámpè Paul ò tø̀ngnø taq vranglv́m íwe svng shálún shìe.

Svrabín koqkámpè Francis taqkèní dvkámwe taq dalvm dø íwe mvshér pvrárì, vdè góng svn cipshìwe tvràrì taqkèní dvshá mvrécè shøq yv̀ngà we lòngzàpè Yesu ò mònggv̀n svng tuqráì we dangrì svng vchànglv́m dvpvt dvkámnø̀ nònggwòn ziwe gø íe.