FABC lìpùngmè kaq Svrabín koqkámpè Francis ò dvkám kà

FABC lìpùngmè kaq Svrabín koqkámpè Francis ò dvkám kà

Svrabín koqkámpè Francis taqkèní Asia dan svrado àngké mvdò (FABC) ò (50) nǿng gøm lìpùngmè dvpvt dvtúwe mòngkà

Shóngshø̀ngwe Asia dan Svrado àngké mvdò vnvm vchangrì, nàmaqò svrado àngké mvdò svng 1970 nǿng kèní poqpv́ngshì bǿì wegø íe. Svrabín koqkámpè St. Paul (6) bat taq Asia dan svng zaqlè diwe tvrà taqni Asia dan vdòng wedø svradorì àngké mvdò svng poqpv̀nglv́m gálòng svng vtoshì lún yv̀ngshà wegø íe. Shvngø̀mré vsv̀ngrì shvngbe vzø̀mnø̀ Asia dan taq tóng laqyàrì vháng vlúnwe chø̀m tø̀ngnø tiqlòng wanø̀ bø̀ngshv̀ng ráì wegø íe.

Yadø wáshì wenø “ vsv̀ng tiqgǿ vrv̀m nø to kèní kadø bø̀nlv́m wawe gàmrì nø mvsat shaq íe” wawe kámnøtrì kèní lutshìnø vsvng tiqgǿ vrv̀m kèní vdè kadángte dvzaqshì we zìdang taq cv̀nnø kadø íwe zìdangrì svng ínìgø jór lúnshìe wawe dangrì svng kámshì ráì wegø íe. Shòlaqrérì vdòng taqgø àngmaqò dvdamshìwe yøpnv́ng shø̀ngranrì, nøt dvbumshìwe dangrì, nøt tønshì we laqyà mv-vl vsvngrì, nøt tǿngwe tvrà mv-vl vsvngrì nø tónglaqyà tvràrì taq gø màbóngwe ínø àngmaq dvhø̀ taq døngmvn we àngmvdò tiqlòng bǿn lúnlv́m dvpvt ràvchvkwe dang nøt vshat ráì wegø íe.

Asia dan ò sasvna nø dvshà vsvngrì ò gvray dvbùshvng sasvna tiqshvrà íwe taq vsak bat shìcv̀mwe sasvna shvrà tiqlònggø íe. Asia dan vdòngtaq dvgá màbóngwe shvngø̀mré àng dvgàngrì nv̀ng gø muqhǿm mvngushì we tvràrì taq bø̀ngshv̀ngwe tiq shvrà gø íe.

Nøngmaq shvngbe nø àngnvm àngchangrì vjøng nøt taqkèní taqsv̀ng vzø̀m vzvplv́m, cv̀ndøng dvrárì gv̀l lv́m vchvk we íe. Shvngø̀mré vsvngrì ò tìløp kámshìwe Scramento kèní cvn vduwe døngjá rì kaqsv̀ng shvngø̀mré vsvngrì taqkèní dvgøm lúnlv́m dvzaqshàì.

Vsvng shvngbe taq bø̀nwe tvràrì, kù:ngà vlwe, kù:ngà vnǿnwe dangrì svng vpǿ shvring lv́m wàì. Shvngø̀mré gwørwang vrvm taqkèní vtóng laqyàrì svng vpǿ shvring shìlv́m wàì.

Shvngbe mvdàm Gvray yv́ngkèní ìshøt ìgv̀n leqlún dá:rnø̀ng. Namaq shvngbe dvpvt ngàí vjúrøt dvba:ngìe. Ngà dvpvt gø vjurøt dèbangvt shà” wanø Svrabín koqkámpè Francis í dvtú we íe.