Gvray nø kø̀mzøpwe rvcángcèrì sv̀ngwa shóngwám shìwe møí

Gvray nø kø̀mzøpwe rvcángcèrì sv̀ngwa shóngwám shìwe møí
Kàngpè Yesu nø àngkaq nøt vtiqwe dvzv́r Toma svng shóngnøt dvtanā we kà taqkèní vtoq shì yv̀ngì. Wedø vtoqshì we lòngnø kø̀mzøpwe rvcángcè rì sv̀ngwa shóng wámshì we møí we sv̀ng dvtanā we íe. 
Kàngpè Yesu ò dørø̀m ámpà ám bóy taq Yesu tuq ráì dvgvp weyv́ngø dvzv́r Toma mv-vl dvrwe svng yv̀ng bǿà. Dvzv́r Toma taqkèní nøngmaq shvngbe tiqgǿ vrv̀m svng kàshvbóng taqkèní tvnùng we íe. Nøngmaq shvngbe gø Yesu shìlòng kèní vrá zunlúngì nø nøngmaq nv̀ng tiqdø àng vlwe nv̀ng nøngmaq shvngbe ò lvpat rìsv̀ng øpkapng we dang sv̀ng kadø wa ká:mìe, vtiqlv́m tvrà kèní kadø kám lúnìe ma?
Shìlòng kèní vrá zun ráì we àng shagóng sv̀ng nøngmaq shvngbe tiqgø vrv̀m í pàwálv́m chvpdvp zǿm mvlúnì má? Àng ò cúnshìwe tvrà, àng ò chutchángwe dvsháza shóngnøt svng síngshá lúnlv́m dvpat pàwálv́m shvng shvng wa shá mèdèzv́r ì ma? Wawe røt kàrì gvzàni vl longe. Nøngmaq shvngbe nø dvzv́r Toma døni nøt vtiq lv́mrì vl:ì wewa íshàe.
Wedøíratnø nøngmaq shvngbe nø shvraq shìlv́m tvrà pà tiqpv̀n gø mv-vl. Dèni nøngmaq ò gvray mòngkà taq dvzv́r Toma ò dang svng yv̀ng lúngì dvgvp Kàngpè Yesu nø kø̀mzøp we rvcáng cèrì kaq wa láò we møí walòng sv̀ng dètānì we íe.
Vdè nø vdè tiqgóng sv̀ng kø̀mzøp bǿngà wanø lán shàì we rvcáng cèrì, shvngø̀mré rì sv̀ng yv̀ng lúngì dvgvp dvshá mvré íwe sv̀ng yv́ng lún shìe. Pàwálv́m wani Kàngpè Yesu í láò we vsv̀ngrì wawe shìpvn taqkèní àngmaq nø vtiqshì we vsv̀ngrì írat íe.
Kàngpè Yesu í nø àngkaq nøt battut vtiq we mv-vl vsv̀ngrì kaq sv̀ng láò we møí. Vdè nø rvcáng cèrì ò kámnøt tvrà dang taq kø̀mzøpe wanø̀ kámshì wegǿ nø tiqdang dang taq nø vléshì we íe. Kámnøt tvrà wawe taq dvzv́r Toma døni gálòng nv̀ng dø lòng tiqdø vshúshì sháò wegø íe. Ínìnø kadøíwe kámnøt nø dìnglòng íe ma? Pv̀ngyv̀n nøt mvsøn kèní kám vlǿm shìwe, shvrúng nøt zángshì we, shò shò wa nøtí dvzaq shìwe, tiqdang taqkèní mvjòrwe shìwvtrì dvhø̀ vtiq lv́m dangrì svng dvshér dvzaqshì we ni íe.
Gvray dvbùshv̀ng bv̀nlì taq nøngmaq shvngbe nø yv̀nggùng dvzaq shìlv́m dvzaqshì ràwe íe. Vtiq lv́m tvrà wawe vrv̀m nø mvrà møí. Kámnøt tvrà ò tvrà dvgoq tiqyv̀ngcè wani íe. Welòng taqkèní màng ò vlé shàì we dvdam nøt rìsv̀ng màng shèdøngāì we íe. Nøngmaq shvngbe nø tubùm dvbangā lv́m rà vchvkì we vsv̀ngrì wani íshàe. Gvray yv́ngkèní mvkok nø tubùmā we jejú rà vchvkì we vsv̀ngrì wa íshàe. 
Shóngshø̀ngwe vnvm vchvngrì mvkø̀m mvzøp we rvcáng cèrì ò lvpat wawe nø téwa shvla nø ring longe. Welòng taq cipshìwe nøt kèní Yesu yv́ngsv̀ng dìlv́m wàì. Vdè tiqgóng ídǿmshì we nøt nø mvrà svng vpo dvzv́r sháò we íratnø̀ ìshøt mv-vl long.
Kadø íwe nøt mvsøn kèní cúnshàì we ínìgø Kàngpè Yesu í nøngmaq sv̀ng mègurì, kadvgvpgø èshòngìe. Nøngmaq ò nøt mvsø̀n bángkà cøtshaq vlì we ínìgø àng nøngmaq shvnvngø tuqhøq dilonge. Pàwálv́m wani vtiq lv́m nøt mvsø̀nrì sv̀ng dvzv́r Toma døni dvshérā lv́m dvpat àng dilonge. Nøngmaq sv̀ng shvraq chaq lv́m dvpat àng dilongwe møí. Wedø dilong lòngnø àngò dvsháza shóngnøt í nøngmaq kaq kùngà vnønwe dang svng shvdǿm nø dvtanā lv́m dvpat màng íe. 
Kàngpè Yesu nø nøngmaq shvngbe dvpat vko vkángrì mv́nāwe gvray íe. Nøngmaq shvngbe sv̀ng tiq tvrà ku møí ni tiqdang ku ètánā ìe. Kàngpè Yesu í rvgaq mvdàmø làngdø̀m nila taq vhǿm yv̀ngà we dvshà mvhøt lv́m dangrì sv̀ng dvdamì. Wedø mvhøt lv́m tvràrì taqkèní mvchum ké yv̀ngà. Yesu àngí wedø íwe shìwvtrì nøngmaq kaq mvtuq lv́m kámá yv̀ngshà we íe.  Kàngpè Yesu ínø kadvgvp gø mvrà nà roqāìe. Yadø íwe tvrà taq nøngmaq sv̀ng dvsháza shóngnøt í mèkok ìe. Tiqdá vsv̀ngrì ò mvhøt lv́m tvrà rì kaq shvzǿā we íe. 
Svrabín koqkámpè taqkèní dvtúnø nonggøwn ziwe taq Kàngpè Yesu nø jø̀ng jǿngnii shìyv́ng kèní zunbǿì. Kàngpè Yesu nø nøt mvsøn shèrwe vsv̀ngrì tiqgǿ vrv̀mò mvsøn nvrøm kaqsvng shvlawe yøpnv́ng shø̀ngran rìí cúshì dvzv́r òe. Tvrà vmvnwe vsv̀ngrì tiqgǿ vrv̀m ígø gálòng sv̀ng vtoshì lún ì nø nøt vwángshì lúnwe jejú ìshøt vtoshì laqlúnì wanø vjúrøtā dvbangwe taqkèní tvnùngvtnà we íe.