Gvray vdòng taq nàzø̀mnøng, ngànshà pèò dvløt gvzàmwe tvrà taq àngmòng kàrì kèní pv́n vshvt èwáshìnøng

Gvray vdòng taq nàzø̀mnøng, ngànshà pèò dvløt gvzàmwe tvrà taq àngmòng kàrì kèní pv́n vshvt èwáshìnøng

Yesu Kristu nø tìløp Yohan wur taq tìløp kámshì bǿì mèpvng, ngànshàpè ò dvløt gvzàmwe nvng gvsat vjønwe tvrà svng jór lúnò wegø íe. Wedøni nøngmaq shvngbe gø ngànshàpè ò dvløt gvzàm we tvrà taq kàngpè Yesu døni Gvray mòngkà rì svng nøt mvsø̀n taq vshøp shàì nø̀ ngànshàpè kaqsvng gvsat dánglún lv́m Gvray àng vdòng taq vzø̀mì wanø shvdǿm we íe.

“nøngmaq shvngbe nøt mvsø̀nrì svng Gvray àng wur taq gv́lshàì nø̀ àngò mòngkàrì kèní dvløt gvzàm we dang vrv̀m rì kaqsvng rvtø̀ vrv̀m taq dáng lún daqìe. Yesu Kristu tìløp kámshìwe rvtø̀ taq shv̀nshér pvlàcè nø kāøcèdø wáshì nø tuqráì wedøni nøngmaq shvngbe gø Yesu Kristu svng vto shàì nø àng vdòng taq vzø̀mìwe ínìnø shv̀shér pvlàcè nø nøngmaq nvng tiqdø kadvgvp gø tiqdø vl longwe íe” wanø shvdǿm we íe.

Ngànshàpè nø Yesu Kristu 40 ni 40 yaq døp ám-vq vnvtshì nø vjurøt dvzaqshì werat Gvray mòngkà kèní we ngànshàpè kaqsvng jór lúnò we íe. Nøngmaq nø mònggv̀n dvrèrì kaqsvng nøt vyuqì we nvng we dang kèní ngànshàpèí nøngmaq kaqsvng dvløt gvzàmwe wáshì long dvgvp Gvray mòngkà kèní dánglún lv́m dvzaqshì ràlonge.

Yesu Kristu nø ngànshàpè Satan nvng kadvgvp gø vzø̀mwe tvrà mvwáshì, àngmaq dvhø̀ taq shvrv́m shvráshì we gø mvwá shì. Gvray àngmòngkà nø vsvng shagóng svng dvchøpshì ráì. We mòngkà nø Yesu Kristu àngni íráì. Gvray mòngkà íwe Yesu àng ratnø̀ ngànshàpè ò dvløt gvzàm we dang àngmvtú svng dvtanā we nvng jór nònggwòn lúnò wegø íe.

Yesu Kristu àngò jejú rì svng dvdam dvtøp shàì, welòng nø nøngmaq kaqsvng dvløt gvzàm we vhǿmì we rvtø̀ taq nøngmaq kaqsvng dèbang lú:ngìe. Yesu àngmè Mari gø Gvray àngò mòngkà rì svng vtoshì nø cipshìwe nøt mvsø̀n kèní shvngbe svng cv́n dvgøm lúnwe gø íe. Àngò laqyà shvlárì svng cvn dvgømì nø yadø ám-vq vnvtshìwe nila taq pvlàcè kù:ngàrì lushì lv́m wàì wanø Svrabín koqkámpè Francis taqkèní dvkámnø̀ shvdǿm wegø íe.

By: Mr. Gregory