Kàdvtut shú Esaya ò kà 5 kà

Kàdvtut shú Esaya ò kà 5 kà
Kàdvtut shú Heshayaqí shø̀n ráà we kàciq 5 dang vle. 1 taq dvbù lv́m wawe ínø̀ Gvray shv̀nshér pvlàcè nø nøngmaq nvng vlwe ínø̀ dvshà vsv̀ngrì dvpvt dvbùshv̀ng mòngkà dvshvng lv́m dvpvt ngà kaq sv̀ng shø̀ngran èzønge wanø̀ shø̀n ráà. Dvbù lv́m tvrà mv-v́l shaq dvbùshvng mòngkà svng dvshvng lv́m mv-vl. Yesu Kristu ò dvbùshvng mòngkà dvshvng lv́m wawe taq nv̀mlat dvbù lv́m tvrà v́l rà longe.

Yesu Kristu àngò dang svng shvkse wáshì we tvrà nø dvbù lv́m tvrà tiqlòng ni íe. Dvbù lv́m tvrà mv-vl we rvcángcè tiqgǿ lvpat wawe nø vtang kèní nøt ròl rà gø íe. 
2 taq nø chutcháng lúnwe íe. Shvnip shvnvr vhǿm:ò we vsv̀ngrì shvngbe svng chutcháng lúnlv́m dvpvt Yesu Kristu svng dvzv́r lú:ngà we íe.

Dvbùshvng mòngkà dvshvngwe yv́ngkèní tashì lv́m vsv̀ngrì kaq vkang lv́m dvpvt møí nø̀ lutshì dvzv́r lv́m dvpvt mv̀ng íe. Yesu mèpvng zv̀nwe lvpvt nø mvjòr lv́m, apnúngshì lv́mrì nvng vzø̀m we íe. Yesu Kristu nø nøngmaq kaqsvng vlishìwe paqdàng kèní lutshì dèzv́rì we íratnø mvrà wawe vlishìwe paqdàng kèní lutshì nø dvbu dèzv́rì we íe. 
3 taq nø gálòng wawe íe. Ne mv̀n rìí vrá yv́ng dvzv́r lúnò pè tuqrae wanø shø̀n yv̀ngà.

Yesu Kristu àng rvgaq mvdàm svng shi mvtuq rawe kàgvp ànglí bat taq nemv̀n rì svng dvbanò we tvrà mvyáng shìyv̀ng. Gálòng svng vrá yv́nglún dvzv́r we nø chutcháng lv́m tvrà ò àng nvmik tiqlòng gø íe. Welòng nø vne tiqlòng svng wa shvzǿmò we mǿí, lvpvt àngshv́r svng vrá yv́nglúnò we gálòng gø íe. Gvray àng dvsháza shóngnøt vdòng taq vrangshì we lvpvt svng kadø íwe lvpat mvrùmè rì vkǿn rawe ínìgø døngmvndø cúnshì lúnlv́m dvpvt nøngmaq shvngbe dvpvt gálòng nø vchak we íe. 
Kàdvtut shúpè Esaya í shøn yv̀ngà we kà 4 taq nø vna shvzø̀mò we tvrà íe. Shvnip shvnvr we vhǿmò we yv́ngkèní shvlut lv́m tuqrae wawe taq yóga, zø̀nli àngpv̀n pv̀n rat mvhøt lv́m vhǿmò we vsvngrì, vléshìwe mvràrì ratnø rvyù rvyóng lv́m vhǿmò we rì dvpvt shǿn mvyǿ we íe. Vsvngrì shvngbe taq vléshì we mvrà wawe nø vl wewa íe. Vsv̀ngrì ò mvràrì kaqsvng dvshérā lv́m dvpvt Yesu Kristu àng wurí ègoìe.
Làngdø̀m kà 5 taqnø dvshà vsv̀ngrì wanø vtàn ráà. Dvshà vsv̀ngrì àngmaq nø vsv̀ngrìí yv́ng mvtàmvm we vhǿmòe. Ínìgø Gvray àng taqkèní kadvgvp gø mègu:rì we íe. Yesu Kristu svng vtoshì bøwe vsvngrì taqkèní wedø íwe dvshà vsvngrì kaq yv́ng mvtàmvm we wá mvdaq. Nøngmaq shvngbe gø àngmaq nvng tiqdø ni íshàwe dang síngshá ràwe íe. Vsv̀ng tiqmaq taq mvrà chutālv́m rà vchakwe vsvngrì vl longwe dø tiqmaq taq íranìnø nònggwòn kùnggà rì ràwe gø vl longe.

Vdè tiqgǿ dvpvt kø̀mzøpme wawe kadvgvp gø mv-vl long. Wedangrì shvngbe dvpvt nøngmaq nø Gvray àngò dvsháza shóngnøtí mèkok ìwe vsv̀ngrì íshàe.