Kristu koqkám nø nøngmaq nvng tiqdø vle walòng svng shakse wáshàì

Kristu koqkám nø nøngmaq nvng tiqdø vle walòng svng shakse wáshàì nø chvpdvp lvpatrì taqgø cvn dvgøm dvzaqshì lv́m dvkám we

November 20 ni Kristu koqkám bóy àngni taq Svrabín koqkámpè Francis taqkèní weni ò noqngø̀m tvyø taq dvkám wenø Kristu koqkámpè nø Kàngpè Gvray nvng tiqdø vl we ínø àngnø nøngmaq nvnggø tiqdøni vlì we íe. Weratnø̀ welòng svng nøngmaq shvngbe taqkèní shvkse wáshì lv́m dvkám wegø íe.

Kristu koqkámpè nø shvngbe dvpvt koqkámpè íwe taq wetvrà svng nøngmaq mònggv̀n vsv̀ngrì ò vgo mv́rcì taqkèní kadøgø dvdam mvrǿnshì we tvrà tiqlòng gø íe. Àngnø mònggv̀n zaqlè tvrà svng dinø àngkaq svng vtunø shvtnò we dangrì svng vle lúnò dá:ngí mònggv̀n vsv̀ng shvngbe svng mvrà kèní chutchángāwe, døngmvnwe tvrà shvngbe kaqsvng dvchøpshì nø gálòng sv̀ng èzí ráshà wegø íe.

Kàngpè Gvrayí gø we lòngzàpè sv̀ng nøngmaq shvngbe dvpvt àngnvng tvpníshì lúnlv́m dvpvt èzí bǿshà wegø íe. Welòng nø àngò nøngmaq mvdàm taq gv́lshì we dvsháza shóngnøt gø íe.

Nøngmaq shvngbe dvpvt koqkámrì mvdàm koqkám wawe nø wepèni íe. Nøngmaqò lvpat taqgø àngkaq svng koqkám shvrà taq vtoì nø noqngø̀mì we ínìnø shvlá vtangwe tiq tvrà gø ílonge wanø shvdǿm wegø íe.

Kristu koqkámpè àngnø dvshà mvhøtwe tvrà, mvkø̀m mvzøpwe lvpat, kùngà vnǿnwe lvpat nvng dvshá mvré vhǿ:mò nø shìlòng svng vtoshì yv̀ngì we ínø wedangrì shvngbe nø nøngmaq kaqsvng vtang kèní shóngshì we ò gømla tiqlòng gø íe.

Nøngmaq taqkèní Yesu wurgáng svng yv̀ngì nø nøngmaq shvngbe taq kadø íwe mvhøt lv́mrì vkǿn rawe ínìgø, døwe tvrà vdòng taq vmv̀nì we ínìgø àngnø nøngmaq kaqsvng shóngshì we dang dvtanā wegø íe.

Àng shvnvng svng tvpníshì nø vl-we vsvngrì nvng àng kaq svng yv́nglúnò we vsvngrì 2 mvdò nvng singnø gø Svrabín koqkámpè taqkèní shvdǿm wetaq Yesu wurgáng shvngvngø ripnø àngkaq sv̀ng dvjaqò we vsvngrì í nø Yesu àngkaq svng nà góng sv̀ng nø shèlútshì wanø shvyǿm:mò werì wàòe. Cèlrì, weyv́ngø vlwe shaqré shaqtangrì, nøt mvlíngshìwe dvmyaq 2 gø àngmaq ínø Yesu svng shvyǿmòe.

Yesu àng shvnvng taq ripnø̀ àngò dvshà mvhøt lòngsvng mvrézaá we vsvngrì nø shvlawe nøt mvsø̀n zangrì ni íe. Àngmaqò nøt mvsø̀nrì taq we shvrà taqni vdángvm we mv-vl, àngmaqò nøt mvsø̀n taq kadvgvpgø we tvrà svng zángshì nø nøt vwángshì we dvmyaq 3 gǿ kèní 1 gǿ ò nøt mvsø̀n svng gø cvnshì lúnràwe gø íe. Àngshø̀nwe taq Kàngpèá nà móngdàn taq ngà svng gø mvré èza:ngvtnà wanø vtàngwe àngò dòngnøt kèní nøt vwángshì lúnwe dangrì svng nøngmaq shvngbe taqkèní cvnshì shvlawe tvrà gø íe.

Shvlawe tvrà taq cvn dvgøm lúnlv́m dvpvt nø Gvray àngò bø̀ng svng goì nø we shvrà kèní pv́ngshì shvlawe gø íe. Nøt vwángshì we vkǿ, dvmyaqpè døni vzàng kaq kadø íwe mvràrì vléshì we ínìgø vdè taqkèní wá vléshì bøwe mvràrì svng dǿmshá shàì nø Gvray àngò shóngnøt svng vtoshì lúnì we nøt mvsø̀n svng gv́lshì ràwe gø íe.

Nøngmaq taq wedø íwe kámnøt rì jøng jǿng ni vl bǿì má? Dòngnøt vjøngí àngkaq svng tvpní shàìe má? Nøngmaqò nøt mvsø̀nrì svng àngkaq kámnøt dànzø̀ng dø gv́lshì ràìe. Kristu koqkámpè àngkaq svng vtoshì mvlúnì we ínìnø nøngmaq nø rvgaq yachàng mvdàm taq cúnshàì we ínìnø nøngmaqò dvciq lvpat gø̀nshaq sv̀ng chutchángshì lúnlv́m mv-vl long.

Gvray àngò mvbewe shóngnøt rì nv̀ng àngò jejúrì svng vtoshì lv́m wàì wanø̀ Svrabín koqkámpè Francis taqkèní shvdǿm nø nònggwòn ziwe gø íe.