Laqyà shvlá cvnshì shvlawe vyv̀ng roqshú ò mvsø̀n nvrø̀m

Laqyà shvlá cvnshì shvlawe vyv̀ng roqshú ò mvsø̀n nvrø̀m

Kámnøt tvrà lvpvt ò mvnggá nø kàngpè Yesu Kristu àng tiqgǿ ni íe. Yohan lèga taq kàngpè Yesu Kristu svng dvbùshv̀ng mòngkà wanø vtàn ráà wegø íe. Kàngpè Gvray àngò laqmùrì shvngbe nø chutchángwe tvrà vrv̀m singwe gø íe. Nv̀mlat nv̀mpv́ng rvtø̀ kèní we dvbùshv̀ng mòngkà nø v̀l ráì. Kàngpè Yesu ò kàshaqrì vlwe mvtaq àng tiqgóng gø ni dvbùshv̀ng mòngkà íwe íe. Dvbùshv̀ng mòngkà nø nøngmaq shvngbe ò manggá tiqlòng døni kàngpè Gvray kaq svng tvnù:ngò we ínø̀ mònggv̀n vsv̀ngrì ò lvpat rì taq tvpníshì nø tuqráì wegø íe.

Gvray dvbùshv̀ng mòngkàrì taq Kàngpè Yesu nø Kàngpè Gvray nvng tiqdø íwe svng vtàn:ò wegø íe. Kàngpè Gvray nvng vhøm dvzv́r we vjúrøt shìwe tvrà rì kaqsvng jejú tiqlòng ku vtoshì lú:nìe. Vchvk vtangwe kàciqmè rì, rvcvngshì lv́m tvràrì kaqsvng Yesu Kristuí vjúrøt shì dá:ngí wa wàò wesvng yv́ng lúnshìe. Vjúrøt shìwe tvrà taqkèní shv̀nshér pvlàcè Gvray nvng Kàngpè Gvray àngmaq shvngbe nø vzø̀m we íe. Yesu Kristuí àng rvgaq mvdàm svng tuqráì we tvrà nø vjúrøt shìwe yv́ngkèní shálún shìwe gø íe. Àng tuqráì we tvrà nø àng lvjøm vl wegø íe. Kàngpè Gvrayí nø lòngzàpè kaqsvng rvgaq vsv̀ngrì kaq chutcháng lv́m dvpat dvzv́r:ò wegø íe.

Lòngzàpè Yesuí nv̀mlat dvbùshvng mòngkà dvshv:ngò we rvtø̀ taq dàlv́m dø íwe nvmik gømla rì mvwà yv̀:ngò. Àngí wà yv̀:ngà we bv̀nlìrì nø vjúrøt shìwe tvrà kèní kàngpè Gvray nvng vzø̀m weí vsvngrì dvhø̀ vzø̀m vzvp we íe tìløp Yohán ò wurtaq àng tiqgóng tìløp kámshì we nø àng tiqgóng gø mvrà vlwe vsv̀ng wanø̀ cunshì we dá:ngí vyv̀ng roqshú shvlá nø àngò vyv̀ngrì dvpat àngò lvpat svng gø mà mvzashì wawe kà svng dvgøm ráà wegø íe.

Vyv̀ng roqshú lvpvt wawe nø rvtø̀ tiqlangcè dvpvt wa møí dvciq lvpvt apnúng shìwe íe. Vyv̀ngrì nvng tiqdø vlnø̀ shvlá vtangwe shvrà taq gv̀l nø roqrim we nvng àngò tiqlvpvt shvngbe svng èzí ráshà we íe.

Yadangrì shvngbe svng singnø shvngø̀mré vdòng taqgø vyv̀ng roqshú, vyv̀ngroq bv̀nlì wawe kà svng shvngbe í tá vrá bǿshà wegø íe. We tvrà kaqsvng yv̀ng lúngì dvgvp nøngmaq shvngbe ò vlǿm rà manggá íwe Yesu kristu ò laqyàrì nvng gø shvngbóng shìnø dvdut shìlv́m gø rà vchvk we íe. We tvrà rì svng nøngmaq shvngbe taqkèní jø̀ng jǿngni cv́n dvgømì we íe má? Cun dvtøpshì ràwe íe. Gvray àngnvng vzvr bǿì we àngni taq nøngmaq taqkèní pàgø wálún lv́m mv-vl long kùngà vnǿn we vsv̀ngrì nvng cv́m vtang we gǿ kaqsvng dvsháza shóngnøt kèní mvkok we tvràrì svng cvn dvgøm ràwe gø íe.

Vyv̀ng roqshú wawe nøt mvsø̀n taqkèní dammá vcaq bǿì we Yesu Kristu àngò síngshá ìwe vdòng taq wedø zá vtøp lv́m vhǿm:ò we vsv̀ngrì kaqsvng dvzøm lv́m wàì. Tvrà vmv̀n nø vmvngvm we vsv̀ngrì kaq svng lálv́m wàì. Vdè góng vdè svng wa roqgvr shìwe vyv̀ng roqshú nø nøngmaq dvpvt v́l mvrà. Tiqdá vsv̀ng kaq roqgvr nø dvzømshì we vyv̀ng roqshú wa ràwe íe.

Yesu Kristu ò mvsø̀n nvrø̀m kèní cvnshàì nø shóngnøt zø̀ngwe vyv̀ng roqshúrì, vdè tiqlvpvt svng àngkaq apnúng shìlúnwe vyv̀ng roqshúrì bǿnlún lv́m dvpvt ìshøt jejúrì svng røt shìlv́m wàì.