Mèpvng bø̀nrawe Svrabín koqkámpè nø ka móng kèní írae má?

Mèpvng bø̀nrawe Svrabín koqkámpè nø ka móng kèní írae má?
Yalòng nø dvdam lv́m tvrà tiqdang gø íe. Yanila taq Svrabín koqkám vya svng kámshì lún vdue wawe vsv̀ng 21 gǿ vlwe gø íe. Svrabín koqkámpè Francis nø Cardinal mvdò svng vrá tiqkvt rvm bǿà we ínø̀ tuqrawe September taq dvráshvng vrìng lv́m íwe dang shálún shìe. Wedø tiqkvt vrá rvmshì we Cardinal rì shvngbe nø 243 gǿ íranø̀ werì shvngbe taqkèní 137 gǿ nø vsvk (80) nǿng lv̀mpvng rì ínø̀ àngmaq shvngbe nø Svrabín koqkám rvcàngwe taq (mé) záng lúnshì we vsv̀ngrì gø íe.

Catholic shvngø̀mré vtóng taq Cardinal bø̀nrawe vsv̀ngrì nø Svrado gvbà rì íe. Ínìgø vkvt mèpvng Cardinal àngshv́r bø̀nlv́m íwe mvdò taq nø shvngbe dvpvt dàlv́m dø íwe dang tiqlòng bø̀nlv́m íwe svng dvtú lú:ngà wegø íe.

Pàwálv́m wani Father Angel Fernández Artime dø íwe mònggv̀n taq Saletion mvdò ò shølshú gø Gvray bv̀nlì taq vtang kèní dvzaq dvkángshì we ínø̀ Shvrúngshú bv̀nlì kèní nvrshì bǿì mèpvng gø 16 nǿng døp mvrà vroqā we bv̀nlì taq dvzaq dvkángshì we vsvk 96 nǿng íbǿì we Agentina móngdàn kèní Luis Pascual gø Cardinal 21 gǿ mvdò taq vbá longwe gø íe. 
Svrabín koqkám àngshv́r rvcàngwe tvyø taq (mé) záng lv́m dvpvt vsvk kèní mvsat shìwe ínìgø Cardinal rì nvng singwe lìpùngmè svng nø vsvk lvpat rì mvsatshì we mv-vl shvngbe vbá lúnshì wegø íe. Pàwálv́m wani lìpùng ò tìyø vrvm taq vrashì we dangrì taq paqzí mvkrǿm mvdøp vlwe Cardinal rìò kàciqrì paqzí dvkø̀mwe dangrì taqkèní téwa shvla we mvtúrì lúnshì lúnwe ratgø íe. 
Svrabín koqkámpè Francis taqkèní gø àngí shvngø̀mré mè svng shøl we rvtø̀ yv̀nggùng taq vlíng vpo lúnwe dangrì vrv̀m taq paqzí mvkrǿm mvdøprì vlwe Cardinal rìò paqzí dvkø̀mwe tvrà rì taqkèní vlíng vpo, vháng vlún wegø íwe dang vtàn bǿà we íe. 
Cardinal rìò lìpùng taqø ni Svrabín koqkám àngshv́r rvcàng we dang nvng sing nø gø dvmv̀nnø vrashì we wáshì wegø íe.

100 nǿng rvzé høqshaq Cardinal rì nø Italy dvcìrì taqkèní wa shølnø wáshì yv̀ngì nø we Italy móngdàn rì taq wa wáshì ráì we mvshǿl gø vl ráì we íe. 
Svrabín koqkámpè John Paul II bat taqkèní wa móngdàn vrv̀m kèní Cardinal rì vbá ráì wegø íe. Shvngø̀mré vdòng taq wedø mònggv̀n shvrà vrv̀m kèní Cardinal rì vbá lún we nø mònggv̀n dø̀ng nvng sing we Gvray àngbv̀nlì ò lvjøm svng dvtanā wegø íe. 
2013 nǿngò Svrabín koqkámpè rvcàng we lìpùngmè taqnø America tìni móngdàn rì kèní nv̀mlat Svrabín koqkámpè svng rvcang lún ráà wegø íe.

Wewa mvtaq Africa móng, America, Asia móngdànrì kèní Cardinal rì gø gvzà vl wegø íe. 
 Asia móng kèní Cardinal rì nø tuqrawe September 30 ni taq wàlv́m íwe lìpùngmè taqnø Asia móng kèní Cardinal rì téwa vbá longe. Yalòng nø Svrabín koqkámpè Francis ò bv̀nlì ku kèní nv̀mlat vjønvt nà we bv̀nlì mvtú tiqlòng gø íráì. Kadø ínìgø mònggv̀n taq vlwe Cardinal rì tiqnǿng mvdàm tiqnǿng luqmvnshì ráì werat mèpvng kaq Svrabín koqkámpè vya svng kámshì daqwe vsv̀ng nø kamóng ka rvgaq kèní írawe svng nøt dak mvlún shìwe tiqdang gø íe.