Mvpnøt zángshì weò svre dvké we dang

Mvpnøt zángshì weò svre dvké we dang

Pø̀gv̀msùng mvpnøt nø àngkvt kvt àngwa wa bung longwe íe. Vsv̀ngrì mvdàm téwa mvzán lún mvyǿwe nøt lut mvnshì mvbat shvnglutwe nøt mvcø̀n nv̀ng vl lúnlv́m yvk longwe íe.

Mvpnøt zangwe nø vsv̀ng mv̀ngpòng mvdòrì dvhø̀ taqgø vtøp dvzv́r we tiq tvrà gø íwe sv̀ng dèni bat taq zìdang màbóng we tvrà rì gø yv́ng lúnshì we íe. Yadø íwe dangrì nø mvshǿl rì taq mvyv́ng shì yv̀ngwe tvrà rì gø íe. Mà shvla we laqyà tiqlòng íe wanø̀ gø síngshá shìrà longe. Mònggv̀n vsv̀ngrì mvlúngka nø dvshà vsv̀ngrì ílongnø̀ vsv̀ng gorø mvluqwe tiqmaqcèrì taqwa vdá mvgàmwe nv̀ng v́l:nv̀m we vsv̀ngrì vlwe íe. Yalòng nø vdu vbóng we zìdang tiqlòng nø mø:í.

Mvjànrì nv̀ng vzi vrùng wawe tvràrì sv̀ng dvdam shàì, wedangrì ò mèpvnglvp taq mà dvráwe tvrà kèní vmyat la-vm we vsv̀ngrì gvzà vl longe. We mvjànrì ò mèpvng lvp taq vmyat la-vm we vsv̀ngrì ka dángte vl longe má? Jø̀ng jǿng taq shvnat mvzørì nvm, wan-vm we rì ni íe wanø̀ svrabín koqkámpè Francis taqkèní dvtúwe íe.

Wedø mvpnøt sv̀ng bǿn dvzv́r we nø wulaq tvràrì taq nònggwòn kángwe vsv̀ngrì wa mvtaq vsv̀ng tiqgǿ vrv̀m taqgø bǿn sháò we íe.

Vdè tiqgǿ ò lvpat sv̀ng dvdam shàì nø̀ mònggv̀n zaqshøprì taq nøt vdǿn we, mà dǿn we tvrà sv̀ng cun dvtøp shàì. Kadvgvp gø vsv̀ngrì mvdàm chá vle rà we mø:íni kadvgvpgø mvluq mvtàm wanø vbønshì we vle má? Àngnvm àngchangrì dvpat dvdamāìe má? Døngmvnwe tvrà taq vtiq shàìe má? Walòng sv̀ng cun dvtøp shàì.

Mvpnøt mvsø̀n sv̀ng noqò we vsv̀ngrì vl longwe sv̀ng svdiq vjá shàì. Pø̀ zaqshøp wawe nø gvray kámnøt tvrà taq v́l ràlonge wanø dvdamshì vsv̀ng nø àngkàng 2 gǿ kaq dvzømshì we vsv̀ng nv̀ng vbóngvme. Welòng nø mvbǿn daqwe tvrà ni íe. Pø̀ zaqshøp walòng nv̀ng gvray tiqdang dang sv̀ng wa shówa kám vlǿm shì rà longe wanø Kàngpè yesu í dvkám shaq gø íe.

Gvray í dvtú we tvrà kèní vdá mvgàm we vsv̀ngrì bǿnlún høq dvzaqshì ràwe íe. Dvsháza shóngnøt vshøp lv́m tvrà sv̀ng shvdǿm wegø íe. Yadang taq vdá mvgàm we vsv̀ng nø kagǿ sv̀ng gø mvhøt dvzv́r we mv-vl. Vzi vrùng wawe tvràrì sv̀ng gø mà dvbu:ngò. Vsv̀ngrì kaq tubùmā we zíā, vwánā sháò we nø gvray zaqshøp vdá mvgàm we ni íe.

Mònggv̀n zaqshøprì lá vshøpshì we tvrà taq téwa vchak we nø døngmvnwe nøt mvsø̀n nv̀ng lvpat cúnshì lv́m tvrà ni íe.

Nøngmaq shvngbe nø gvray nv̀ng vsv̀ngrì dvhø̀ tasv̀ng vzø̀mwe tvrà taq vdu vbóngwe tvrà kèní wáshì ràwe íe.

Mvpnøt kèní mø:í dø vdá mvgàm lv́m tvrà taq dvzaq shìlv́m wàì. Yesu àngmè mariq mònggv̀n vsv̀ngrì dvpat dvciq lvpat ngàndøngwe døngmvnwe tvrà kèní lá dvzaqshì ràwe dang svng síngshá lv́m dvpat leq dèbangā daqnø̀ng wanø̀ svrabín koqkámpè Francis taqkèní dvshatnø̀ nònggwòn ziwe íe.