Nøngmaqò chutchángwe tvrà nø Yesu shìyà:ngì we wurgáng tvrà kèní íe wanø Svrabín koqkámpè Francis taqkèní dvkám kà

Nøngmaqò chutchángwe tvrà nø Yesu shìyà:ngì we wurgáng tvrà kèní íe wanø Svrabín koqkámpè Francis taqkèní dvkám kà

Rvcángcèrì nø tasv̀ng shvngo kewe mv-vl, dvsháza shóngnøt zangnø̀ tasv̀ng rvwìngwe mv-vl, nøt shvyvngshì nø nøt shèrwe nø mvrà chutākewe nvng tvle teqshìwe tvrà rì mvwa we íe.

Shóngnøt vjø̀ng nvng Yesu àng shìlòng svng kámshì yà:ngìwe wurgáng mvdàm kèní shvngøt dvtúwe svng vtoshì ràwe íe.

Mvshǿl rìtaq wurgáng wawe nø shìlv́m mvràdàm vhǿ:mòwe vsv̀ngrì kaqsvng shatnò we shvrà ínìgø dènibat nøngmaqí ká:mìwe Yesu kristu ò wurgáng svng vpǿ shvring shàì nø bóy àngni rì kèní shvgùn shvring vjúrøt shàì wegø íe. Pàwálv́m wani wedø shǿngí rvmøshaq íwe wurgáng svng kàngpè Yesu àngò hí, wur rì hvpmò nø̀ nøngmaq shvngbe ò mvràrì svng èchutā bǿshàwe gø íe. Satan í ezí bǿshàwe mvràrì svng màshvlawe dangrì shvngbe svng àngò dvsháza shóngnøt kèní shvzø̀m bǿà wegø íe.

Ruwe bø̀ nvng gønshaq ziwe bø̀

Srabín koqkámpè Francis taqkèní wedø ruwe bø̀ nvng gønshaq ziwe bø̀ wawe dang svng jømciqrì taqkèní shvbóngnø dvshatwe gø íe. Kàgvp ànglí búngámìwe lèga taq yánglúnshì wegø íe. Shànshér we rvgaq svng diwe Isael vsvngrì Gvray àngkaq kámnøt rì shvmáng lúngà. Àngò kà svdiqrì svng vná bǿà. Weratnø̀ bø̀ rìí rúò we vhǿ:mò wegø íe. Shìwe høqshaq rúòwe svng vhǿm yàngà.

Nøngmaq Gvray àng svng kámì we, Gvray àng nøtku kadø cúnshì lv́m wawe nø vtangkèní vchvkwe gø íe. Gvray àngnvng màdudø cúnshàìwe ínìnø Iserael vsvngrì døni vbø̀í rúkéò we vhǿmlv́m wa ílonge wanø shvdǿm wegø íe.

Nøngmaq v:lìwe Kachin móngwv́l vdòng taqgø, døngku tiqchøm vsv̀ngrì vrv̀m taqgø yadangrì svng dvdamshì lv́m vchvk we íe.

Svrabín koqkámpèí shø̀nòwe gønshaq ziwe bø̀ wawe taq Moshi svng Gvrayí wá dvzv́r yàngà we kàmø bø̀ hang rø:pmò nø shvzǿm yàngà wenø Yesu wurgáng mvdàm taq shìlv́m íwe lòngsvng dvtanā we íe. Wedø chángkàngpè svng yàngì nø màshvlawe tvrà mvrà kèní lutshì lúnwe jejú kù:ngàrì lú:nì wegø íe. Shàshérwe tvrà svng dí lú:nìe.

We kàngpè Yesuò wurgáng làngpvngø satan nvng àngí ziwe mvràrì shvngbe nø kratcǿmvm nø satanò kù:ngàrì shvngbe nø weyángø vrø̀l á:mì wanø Svrabín koqkámpè Francis í shvdǿmnø nònggwòn ziwe íe.

We wurgáng kèní kadøwa shóngshì ràwe tasvng vzer kelv́m tvràrì mv-vl dø kadø wàlv́m tvràrì, kadøwa mvrà chutā kelv́m tvràrì yadangrì shvngbe svng shvngøtāwe gø íe.

Rvcángcè tiqgǿku lvpat àngshv́r taq dvbùlv́m, shóngnøt kèní mòngzø̀lwe tvrà svng shvkse wáshì lúnlv́m dvpvtnø Gvray yángkèní jejú ìshøt røtānø̀ Svrabín koqkámpè Francis àngò nònggwòn ziwe mòngkà svng weyángø nvr bǿà wegø íe.