Nøngmaq shvngbe ò tvnù mvnggá lòngnø muqlàng móngdàn wani íe

Nøngmaq shvngbe ò tvnù mvnggá lòngnø muqlàng móngdàn wani íe

Vle bǿì we lvbán svrabín koqkámpè ò mòngkà taq vsv̀ng lvpat shìbø we mèpvng dvdam shìrà we manggá dang nv̀ng singnø̀ dvtú bǿà we íe.

Svrabín koqkámpè Francis taqkèní dvkámwe taq nøngmaq shvngbe ò dvdam shìràwe mèpvng lvpat tvnù manggá nø muqlàng móngdàn íwe dang dvkám wegø íe.

Deni bat høqshaq gvray àngò pv́nmv́n dvrè rì nø dvshà mvhøt lv́m tvrà vdòng taq wani cúnshì ràwe dang nv̀ng vsv̀ng shvngbe gø shagóng vjø̀ng shìvm mèpvng pvlàcè chutcháng we tvrà sv̀ng cashì we íe. Weratnø nøngmaq í cashàì we rvtø̀ vdòng taqni mvrà kèní chutcháng we jejú sv̀ng vtoshì lún:ì we dang dvtú bǿà we íe.

Dvzv́r Polo í shøn yv:ngà we kà taq rvgaq mvdàm cv̀mré tiqgǿ shøq bǿò we taq zàlv́m àngpv̀n pv̀n rì vhǿm shìwe tvrà nø àngwa tuqlong we nø mǿí wanø̀ svrabín koqkámpè Francis kèní gø vrá tiqkvt shvdǿm we íe.

Rvgaq mvdàm:ø àngmè puqwá kèní shøqbǿò mepv̀ng shìvm we nø muqlàng taqlvp dvpat gvray mv́r taq tiqkvt vrá shøq we rvtø̀ ílongwe rat nøngmaq shvngbe nø we yv́:ngø vrá cúnshì ràlong we gø íe.

Vránø kàngpè Yesu rvgaq mvdàm kèní shini màle we rvtø̀ taq dvzv́r rì kaqsv̀ng vzíshaq íwe kàciq rì sv̀ng vrá dvdam shàì “ Ngà longvm nø namaq dvpvt v́lrà dvgǿ dv́ng bǿngò kvt, ngà vrá tiq kvt vtv́ng dak nø, ngà vl yv́ngø namaq gø v́l lúnlv́m dvpvt, ngàí namaq svng lù daqìe.” ( Yohan 14:3) taqkèní dvtú bǿà we íe.

Shìlòng sv̀ng jór lúnò we gvray àng:ò móngdàn nø móngdàn àngshv́r tiqlòng íwe muqlàng taqlvp móngdàn tiqlòngni ínø̀ vsv̀ngrì tiqgǿ vrv̀m dvpvt dvgǿā shaq làngdø̀m shvrà ni íe wanø̀ svrabín koqkámpè Francis taqkèní dvkámnø̀ nònggwòn ziwe íe. Nøngmaq shvngbe ò shagóng vjø̀ng shìlv́m tvrà sv̀ng dvdam mvrǿ:nì we ínìgø gvray àngmóngdàn taq dvtut cúnshì lv́m tvrà lòng nø jø̀ng jøng ni vl longe.

Muqlàng móngdàn dang svrabín koqkámpè Francis taqkèní dvtúwe taq kàngpè Yesu ò kàrì sv̀ng shvngbe kám vlǿm shàì nø nøngmaq shvngbe ò bashà lvpat kèní tvnù manggá wawe dvciq lvpat gø̀nshaq sv̀ng mvsø̀n nvrø̀m kèní dvdamshì lv́m dvkám we íe.

Nøngmaq cúnshàì we lvpat, ni vrv̀m ò wá vduwe bv̀nlì, nøt laqyà rì taq téwa shvla dø cúnshì lún lv́m nv̀ng lvpat rì nø tiqni mvdàm tiqni tø̀ ráì we dang dvkám wegø íe.

Nøngmaq bashà rìò lvpat rì nø mvzi dvyø̀ rì døni íe werì taqkèní àngshì àngwvtrì zílún lv́m dvpvt we mvzi dvyø rì sv̀ng rvgaq dò:ngø løp rà longe. Welòng nø rvgaq mvdàm taq døni vrá tiqkvt shøqò we vhǿm lú:ngòe wanø shvdǿm we íe.

Nøngmaq shagóng yalòng vrá tiqkvt zunlú:ngì wekvt ya rvgaq mvdàm lvpat kèní àngyá dvtàng vháng nø mòngzøl dø cúnshì lú:ngì we dang dvkám nø nònggwòn ziwe íe.

Add new comment

5 + 2 =