Nøngmaq vmv:ngì we rvtø̀ vrv̀m gvray í nøngmaq kaqsv̀ng èlá:ìe

Nøngmaq vmv:ngì we rvtø̀ vrv̀m gvray í nøngmaq kaqsv̀ng èlá:ìe

September 11 ni St. Peter noqngø̀m tø̀m taq Svrabín koqkámpè Francis taqkèní shvngø̀mré vsv̀ngrì kaq nøngmaq vmv:ngì we rvtø̀ vrv̀m nøngmaq sv̀ng èláìe wanø̀ mòngkà kèní dvkám we íe.

Nøngmaq àngmv́r kèní vmv́ng bǿì we rvtø̀ vrv̀m taq gvray ínø nøngmaq sv̀ng èláì nø ezaìe, welòngnø àngí nøngmaq sv̀ng kadv́ngte èshò:ngìe, dvshá èzaìe, kadv́ngte nøngmaq nv̀ng tvpníshìe walòng sv̀ng dvtanā we íe.

Wedang nv̀ng singnø vmv́ng bǿì we vyv̀ngcè dang nv̀ng kàshvbóng, vmvn bǿì we  àngcèpè lo ráì we sv̀ng àngpè í vrá vtoò we kàshvbóng rì taqkèní mongka zíbǿà we íe.

Kàngpè Yesu nø mvrà vlwe vsv̀ngrì nv̀ng tiqdø ám-aq we dang Parisee rì nv̀ng dvrá svrarì taqkèní mvrà shvriò we dang kàshvbóngrì kèní dvshatwe gø íe.

Gvray í nø shvngbe kaqsv̀ng àngò ám-aq bóy kaqsv̀ng vbá lúnlv́m shóngshì we íe. Vsv̀ng tiqgǿ vrv̀m kaqsv̀ng àngò àngcè mvdø̀ng ku èshù:ngìe.

Gvray ínø nøngmaq shvngbe svng vmvngvm we vyvngcè, vmvnvm we àngcè àngpè tiqgø dø èláìe.

Gvray ínø nøngmaq tvrà vmv̀n bǿì wekvt kadvgvp gø nøngmaq kaqsv̀ng èláìe. Wedø vmvngvm we vsv̀ngrì kaq láò we vsv̀ng nø jøng jǿngni wegø sv̀ng shóngshì werat íe. Gvray ínø nøngmaq sv̀ng àngwur zúshì só:rí ècaìe.

Wedø vmvnvm we àngcèrì kaqsv̀ng àngpè tiqgǿku, àngmè tiqgǿku, mvrà vléshì we vsv̀ngrì kaqsv̀ng èláì wegø íe. Àng taqkèní wedø vmvnvm we vsv̀ngrì dvpat nøt dvbumshì we íe.

Vsvng tiqgǿ vrv̀mnø gvray dvpat vchvkwe wa ílonge. Vmvnvmwe vsvngrì, vmv̀nvm we vsv̀ngrì kaq vchvk luò nø nøngmaq dvhø̀ taqgø wedø íwe nøt mvsø̀n rìsv̀ng zángshì lv́m shvdǿmwe íe.

Nøngmaq shvngbe nø gvray nv̀ng téwa tvpníshì lv́m dvpat àng shóngshì we íe. Yesu àngmè mari gø àngcèrì kaqsv̀ng kadvgvp gø mvkok dvzaqshì we íe. Àng yv́ngkèní vjú vrārøt dvzaqshì nø nøngmaq shvngbe nø gvray àngnv̀ng tvpníshì lúnlv́m dvpat svrabín koqkámpè Francis taqkèní dvkám nø nònggwòn ziwe gø íe.