Nøngshv́r ni taq dvtú we Svrabín koqkámpè ò mònggv̀n mòngzø̀l lv́m àngni mòngkà

Nøngshv́r ni taq dvtú we Svrabín koqkámpè ò mònggv̀n mòngzø̀l lv́m àngni mòngkà
Vdè tiqgǿ wa èvl we tvrà nø kadøgø shømløm lv́m tvrà mv-vl long. Mònggv̀n zønli dvjángrì shvngbe svng vgá:mì nø mòngzø̀l we tvrà svng tiqdø dìlv́m wàì. 56 boq waboq mònggv̀n mòngzø̀l àngni dvpat mòngkà svng January 1 ni taq dvtú bǿà we íe. 
1 Tslo 5:1-2 Vnvm vchvng rìé, angni nvng angrvtø̀ dang nø namaq svng kapà gø vrūa mvrà. a 2 Kadø íe wani, Vkàngpè Angni nø yaqdø̀:ngí vkǿ di ra dø tiqdvchá tuq daq we svng namaqí èshánønge wawe jømciq svng mvngushì taq só:rí nøt mvngø̀r, mvzø̀l lv́m tvràrì bung longwe kvt nønngmaqò nøt mvsø̀n tiqgóng køp svng Gvray àngkaq kámnøt kèní ap shìlv́m wàì. Cipshàì we nøt mvsø̀n taqkèní àngmè pvng cv̀:nì we ínìnø àngí nøngmaq svng tvrà shølā lv́m ílonge. 
Mònggv̀n taq vkǿn bǿì we Covid -19 vna zø̀nlì rat nøngmaq shvngbe nø shìwvtrì vdòng taq necǿngniq vl vdu bǿì wegø íe. Mònggv̀n vsvngrì ò vjú ídángte svng gvyaq dvzv́r bǿà wegø íe. 
3 nøng vle bǿì wekvt we long nvng singnø nøngmaq shvngbe í paqzí mvkrǿm mvdøprì lúnbǿshà we gø íe. Vsv̀ng lvpatrì zìdang vháng vlún lv́m dvpat nøngmaq taqkèní kadøwa dvzaqshì ràbǿì we tvràrì svng gø síngshá lún bǿshà. Wedø íwe shìwvt mvrùmè nø mèpvng lvp taq vrá tiqkvt laq mvbung long shvngbe í vjá shìtaq só:rí roqgvr lv́m wàì wanø Svrabín koqkámpè Francis taqkèní dvkám bǿà we íe. 
Mònggv̀n taq mvjànrì dvbu:ngvtnà we nø nøngmaq vsvngrì wani íshàe. Wedø zø̀nli dvjáng vkǿnwe rvtø̀ taq Ukraine dø íwe móngdàn rì vdòng taq mvjànrì dvbung bǿà. Welòng nø vsvngrì dvhø̀ taq vtang kèní mvhøt lv́m tvrà svng dvbungā we ínø̀ mvrà mv-vl vsvngrì kaq mvhøt dvzv́r we ínø̀ nøt yòr lv́m tiqlòng gø íe.
Wedø móng dvjàrì ratnø mònggv̀n dvrè zìpè, dvpǿrì gø tiqni mvdàm tiqni vháng mvnshì ráì we kèní gø mònggv̀n vsv̀ngrì kaq mvhøt dvzv́r ráà wegø íe. Wedø shìwvt rvmè vdòng taq nøngmaq shvngbe ò nøt mvsø̀n rì sv̀ng shvlá vtang dvcøp dvgǿshì ràwe gø íe. 
Svngpv̀n tóng laqyàrì, vzø̀m vzvp vtoq vtiq tvràrì, móng lvmangrì, wulaq tvràrì shvngbe taq yaklv́m àngdang dangrì taqkèní vbam kerawe ínìgø tasvng vzø̀:mì we kùngà shaqrì taqkèní pvran lúnlv́m dvpat tubùm dvbangā kelv́m Svrabín koqkámpè Francis taqkèní dvkám nø nònggwòn ziwe gø íe. 
Dvgùng vlwe vsv̀ngrì, vmíng āna vlwe vsv̀ngrì nvng móng vsvngrì shvngbe ò shagóng shiqshàn tvrà zv̀n dvtut shvlá lúnlv́m dvpat dvzaq dvkáng shàì wanø gø dvtú we íe. 
Mònggv̀n vsvngrì í dvkøq wàng vhǿm lv́m tvrà wawe gø zø̀nli dvjáng tiqlòng dø ni íe. Vránø ya nøngshv́r nøng vdòng taqgø vle á:mìwe rvtø̀rì kèní cvnshàì nø tiqdø vzø̀:mì we shaqí tvmø bv̀nlì rìsvng wá dvzaq shàì nø shvlá we nøng tiqnøng ku dì lv́m wàì wanø dvtú we íe.