Paqzí zùng shvngbe nø vsv̀ng shvngbe kaq pàmvrà vto we shvrà, vsvng shvngbe vzø̀mwe shvrà íe

Paqzí zùng shvngbe nø vsv̀ng shvngbe kaq pàmvrà vto we shvrà, vsvng shvngbe vzø̀mwe shvrà íe

Svrabín koqkámpè Francis taqkèní Gregorian University Conference taq tuqráì we vsvng shvngbe kaqsvng dvmànnø dvtú bǿà wegø íe. Yalòng lìpùngmè nø (Initiatives in Refugee and Migrant Education) wawe mònggv̀n yv̀mbv̀n vsv̀ngrì ò paqzí dang tubùmā lv́m dvpvt nvng singnø̀ dvmv̀n we dang vtàn bǿà wegø íe.

Vdè móng vdè rvgaqrì taq paqzí cvnshì mvlú:nò nø yaklv́m tvrà rì vhǿ:mò we cv̀mré rì dvpvt mvdø̀ng wáshìnø paqzí dangrì taq tubùm dvhángā lv́m manggá íe wanø̀ we lìpùngmè taq Svrabín koqkámpè Francis taqkèní dvkám bǿà wegø íe.

Móngdàn rìsvng øpshøl we móngøp shúrì ò màshvlawe dvrá rì vdòng taq móngzøngcèrì nø wángzà móngrì kaqsvng vtshì vduvmwe ínø̀ wedangrì svng móngdàn vrv̀m kènígø vrá gùndvtøpā lv́m gvzà vchvk wegø íe. Wedangrì svng gùn dvtøp lúnlv́m tvrà nø mvdø̀ng vchvkwe tiq tvrà gø íe wanø Svrabín koqkámpè taqkèní dvkámwe gø íe.

Mònggv̀n móngdànrì taq yv̀mbv̀n bv̀nwe vsv̀ngrì mònggv̀n paqzí svng téwa cvnshì lúnlv́m tvrà dvpvt, àngmaqò vzànglvp lvpatrì vjú dvpvt mvdøng dvdamshì weí tubùm dvbangā lv́m paqzí zùngrì taq bv̀nlì zø̀mwe vsvngrì kaq svng dvtú bǿà wegø íe.

Svngpv̀n dvcìrì kaqsv̀ng zìdang dvhángā lúnlv́m dvpvt mònggv̀n laqyàrì, dvcì kàpv̀nrì dang nvng singwe, màbóngwe kámnøt tvràrì dvhø̀ tasvng vtoq vtip lv́m dangrì taq vtøp sháòwe tvràrì mv-vl lv́m dvpvt vzànglvp lvpvt svng shvladø shvngøt dvtú lúnlv́m Svrabín koqkámpè taqkèní dvkám nø dvtú bǿà wegø íe.

Tasvng mvkok nø roqgvr kelv́m, tubùm dvbangā kelv́m, vzø̀m vzvp lúnlv́m tvrà svng tóng dvzaqshì lv́m wàì wanø we lìpùngmè taq kø̀mngǿm ráì we vsvng shvngbe kaqsvng dvtú nø nònggwòn zíbǿà we íe.