Rvcáng cèrì gǿ vrv̀m kaq vdè lvpat svng svkse wáshì lv́m dvpvt ègòìe wanø Svrabín koqkámpè Francis í dvkámwe

Rvcáng cèrì gǿ vrv̀m kaq vdè lvpat svng svkse wáshì lv́m dvpvt ègòìe wanø Svrabín koqkámpè Francis í dvkámwe

Rvcángcèrì nø kámnøt tvrà taq lvpatrì zíshì we høqshaq àngmaqò jejú ìshøtrì vtoshì lúnlv́m dvpvt Yesu kristu àngkaq svng shvkse wáshì lv́m dvzaqshì ràwe dang Lumen Gentium wawe shvngøt dvtú kàru kèní dvtú we gø íe. We dvtú kàru taq rvcáng cèrì nø vdèò kámnøt tvrà taq shvlawe tvrà kèní svkse wáshì we rvtø̀ taq ínìgø lvpvt be we rvtø̀ høqshaq cúnshì ràwe dang dvkám wegø íe.

Kámnøt tvrà taq lvpatrì zíshì vdu bøwe vsv̀ngrì nø ishøt ìgv̀n vlwe rvcángcèrì ínø̀ dvgá vsv̀ngrì gø wedøni vsv̀ngrì ò mv́r taq svkse wáshì lúnlv́m tvlú dvgǿshì ràwe gø íe. Shvnip shvnvr we vhǿmshì ralong dvgvp kám vsv̀ng, rvcángcèrì nø welòng svng vtoshì lúnlv́m kùngàrì taqkèní dvgǿshì ràe. Pàwálv́m wani shvngø̀mré vsv̀ngrì dvhø̀ taq yadø íwe shìwvtrì màhǿmshì long wanø shǿn mvlúnshì longwe rat íe. Pàwálv́m wani nøngmaq nø Kàngpè Yesuò wurgáng tvrà svng cvnì werat íe.

Kám vsvngrì svng shvnip shvnvr we nø vzàngkaq bø̀nyv̀ngì we rì kuwa dvdam shì lv́m gø mv-vl. Rvcángcèrì wawe nø vdèò lvpat kèní svkse wáshì lv́m dvpvt ègoì we vsv̀ngrì íshà wedang dvráwe tvrà dvpvt lvpvt zíshìwe bǿì we kámnøt shvre rì taqkèní svkse dvtan ráà wegø íe. Dvráwe tvrà dvpvt svkse wáshì wenø rvgaqtø̀m sv̀ng shvwi vja wehøq shvnip shvnvr we mv-vl we ínìgø àngmaqò lvpatrì svng kàngpè Yesu ò laqmù tvràrì dø wáshì lv́m vchvkwe íe.

Yesu kristu kaqsvng svkse wáshì we taq lvpatrì zíshì bøwe kám vsv̀ngrì nø shvngø̀mré mvshǿl taq bat vrv̀m, shvrà vrv̀m, vsv̀ng dvcìrì vrv̀m nvng mvril vrv̀m taq vl ráì wegø íe. Yesu Kristu ò dvzv́r rì bat mèpvng kaq we kámnøt tvrà kèní lvpat zíshì bǿì we vsv̀ngrì téwa luqmvnshì ráì wegø íe. Kámnøt shvre “Martyria” wawe kànø Greek dvcì kà kèní tuqráì we ínø̀ àng lvjøm nø svkse wáshìwe wawe lvjøm gø íe. We dvráwe tvrà taq lvpat zíshì kamshì we vsv̀ngrì nø àngmaq vdè dvpat wa shvre wáshì we mǿí. Àng mvtú nø Gvray àngò bincún nvng vbóng we shvngø̀mré mè dvpvt àngshí àngwvtrì vtoshì lúnlv́m dvpvt wáshì we gø íe.

Rvcángcèrì taqkèní Gvray àngkaq vjúrøt apnúng shìwe bv̀nlìrì taq dvzaqshì we nø we tvrà svng vzíng dvzv́r we gø íe. Wedø íwe shóngnøt nø Yesu Kristu nø àngò gønshaq kèní vsvngrì kaq shóngshì werat zíshì we íe. Werat nøngmaq nø Yesu àngkaq svng shóng shàì wetaq nøngmaqò gønshaqrì svng gø àng dvpvt nvng vnvm vchangrì dvpvt vrá zíshì lv́m vchvk we íe. Vle bǿì we 2000 rvzé nǿngrì vdòng taq shvngø̀mré, kámnøt tvrà vdòng lvpat zíshì bǿì we vsv̀ngrì kaq vrá dvdam dvtøp shàì. Dvráwe tvrà taq lvpat zíshì we nø Yesu Kristu àngò tvrà svng cvnwe ni ílonge.

Svrabín koqkámpè Francis taqkèní vzàng kaq vl bǿì we kámnøt shvrerì dang svngwa dvtúwe mǿí nø chvpdvp lvpvt taq kámnøt tvrà àngdang dang kèní lvpatrì zíshì vdu we vsv̀ngrì kaqsvng gø dvdam nø nøt cun dvtøpshì lv́m dvkám we íe. Wedø vsvng lvpatrì kaq shatwe nø màdvrá we dang kèní bungwe ínø̀ wedangrì svng vgám gvsat lv́m gø vzø̀m vzvpwe kùngà shaqí dvzaqshì lv́m, Gvray àngbø̀n svng maò nø vsvng shatwe wá mvdaqwe dang shvngbe nø Gvray àngò shóngnøt vdòng taq tasvng tubùm dvbangā kéràwe dang dvkám nø dvtú we íe.