September 24 ni nø Svrabín koqkámpè Francis dvpvt mvcøngshøp vpǿ we àngni íe wawe

September 24 ni nø Svrabín koqkámpè Francis dvpvt mvcøngshøp vpǿ we àngni íe wawe
September 24 ninø Svrabín koqkámpè Francis American Congress taq mòngkà dvshvng we mvcøngshøp àngni tiqni gø íráì.
we mòngkà taq Svrabín koqkámpè Francis taqkèní móng lvmang bv̀nlì wawe tiqgǿ vrv̀m svng American móngdàn svng mvkok lv́m nvng we àngmaqò móng vháng vlún lv́m tvrà nø we shvrà taq kø̀mngǿm ráì we tiqgǿ vrv̀m mvdàm bv̀nlì døngjá kadángte vl we tvrà svng vtàn bǿà wegø íe. we lìpùng mè taq Svrabín koqkámpè Francis í móng lvmang nvng singwe dvtú mòngkà taq móngdàn ò lvmang, dvjà rì mvdàm cv̀nnø̀ móng vsv̀ngrì kaq shvt we, lvpat svng shvt we mvrà rì zí òwe tvrà svng battut vgám we dang dvkám bǿà wegø íe.
Svrabín koqkámpè Francis ò mòngkà svng we Congress taq rungwe shølshú vgorì taqkèní gø shaq shaq wa vtoshì bǿì wedang vtàn bǿà wegø íe. Svrabín koqkámpè Francis nø móngdàn dvpvt dvdamā weku kèní kámnøt tvrà, móngzøng cèrì ò tvrà shvngbe svng shvlá vtang mvkok dvtøpā ràwe dang vtàn bǿà wegø íe.
Nøngmaq v̀lì we rvgaq yachv̀ng mvdàm vtang kèní mvrø̀ we, vsv̀ngrì ò lvpat rì svng shvtwe, kámnøt tvrà dangrì taq shvnip shvnvr we sv̀ngpv̀n dvcì rvwìng we nvng vzi vrùng wawe rì nvng dv̀n zø̀ng ámì. yadang rì svng vgám, shvzø̀m lv́m vchvk ámì.
wewa mvtaq mònggv̀n shvrà vrv̀m taq yv̀mbv̀n bv̀n we vsv̀ngrì ò tvrà, kámnøt tvrà rì taq vréshì we tvrà nvng dèni bat ò zìdang vháng we shvnvt mvzørì dang nvng sing nø gø dvkám kà kèní dvtú bǿà we íe.
Svrabín koqkámpè Francis taqkèní vsvng shvt dvrèrì íwe shvnvt mvzø rì nvmvm we tvrà nø mònggv̀n pø̀, zaqshøprì mvdà mvpwe nøt kèní wáshì we íe wanø̀ vtàn bǿà. wedø íwe bv̀nlì rì rvt vsv̀ng lvpat rì gvzà cǿm bǿì we dang vtàn bǿà.
dvtut Svrabín koqkámpè Francis taqkèní vsv̀ngrì kaq kupgvrā we, vcùngwe, shvnglut vko vkángrì zílv́m gvzà vchvk we dang svng gø dvkám bǿà we íe. American móngdàn dvpat vzàng kaq móng vsv̀ngrì dvpvt shvla we bv̀nlì rì wà bǿà we vsv̀ngrì, shaqré shaqtang rì svng gø dvdam nø àngmaq ò mvshǿlrì taqkèní cvnshì nø shvla we bv̀nlì rì svng dvtut wá dvzaqshì lv́m gø shvdǿm nø̀ nònggwòn zí bǿà we íe.
Móngdàn tiqmóngdàn vháng vlún we ò àng mvtú nø shvnglut we tvrà svng kupgvr we taqkèní íe wanø̀ vtàn we nvng dvcì tóng laqyà rì téwa rø ngàngdøng lv́m dvpvt nø àngnvm àngchvng dvcìrì dvhø taqgø tasvng shvnglut we vkángrì nvng vpǿ shvringá kelv́m tvrà svng cvn ràwe dang shǿn vtàn bǿà.
Svrabín koqkámpè Francis taqkèní we dø vpǿ ringnø̀ mvcøngshøp shvla we nvng mvshøl tiqlòng ku vl dvrwe mòngkà svng vle á:mì we September 24, 2015 nǿng taq shǿn dvkám bǿà we ínø̀ yanǿng taq 9 nǿng døp vhøm bǿì wegø íe.