Shòlaqrérì wawe nø shvngø̀mré ò kù:ngà íwervt vzàng lvp svng dìlv́m dvkáng shàì

Shòlaqrérì wawe nø shvngø̀mré ò kù:ngà íwervt vzàng lvp svng dìlv́m dvkáng shàì

Shóngshø̀ngwe shòlaqré vnvm vchangrì …

Nàmaqnø mònggv̀n zìlàngré àngni dvpvt dvgǿ shaq èív́mshà. Mònggv̀n làngré àngni svng wàlv́m 3 shvlá wa ràbǿì we íe.

Nàmaqò nøt mvsø̀nrì taq kadø dvdamnøt rì vle walòng svng gø ngà í síngshá lúnòe. Bv̀nlì wàngrì mǿíni paqzí dangrì taq kadø jór nònggwòn lúnlv́m kadø dvzaqshì lv́m wawe nøt mvsø̀nrì vkǿn we rvtø̀ gø íe.

Wedø íwe vdòng taq mònggv̀n làngré àngni bóy svng kadø dílúnlv́m wawe dvdamnøt rì vdòng taq mvhøt lv́m àngpv̀n pv̀n vkǿn we svng gø síngshá lúnòe. We bóy àngni svng góng lúnlv́m wawe shø̀ngran lòng gø vnvpwe dvdam shø̀ngran nøt tiqlòng gø íe.

We døíwe bóy svng vbá lúnlv́m dvpvt dvcøp dvgǿshì lv́m gø vrìngvtnìe dvdam shø̀ngran nøtrì kèní dègǿ shìnø̀ng. Pàwálv́m wani yadø mònggv̀n shòlaqré àngni dø íwe bóy mè rì nø paqzí mvkrǿm mvdøprì gvzà zílún we ratgø íe. Vdèò lvpvt tvrà taq kadvgvp gø màná dø̀mrø tiqlòng ku vl longe.

Nøngmaq ò nøt mvsø̀n rì kèní lálúnì we kùngàrì zǿmdàng longwe mvtaq dvgá wángzà vsv̀ngrì nvng gø vzø̀m vzvp vtoq vtip lún lú:ngìe.

Wedangrì shvngbe nøngmaqò dòng nøt mvsø̀n rì taq kadvgvp gø vl longwe ínø̀ kù:ngà tiqlong ku vpo longe. Làngrérì nø shvngø̀mré ò kù:ngà tiqlòng íwe rat shòlaqré rì vzv̀nglvp svng dì lv́m wáshàì.

#PopeFrancis