Shøngran yøpnvng rì nvng shvla we tvnù mànggá rì kaq svng gvray í shvmán dvgøngā we vtoshì leqlún nøng

Shøngran yøpnvng rì nvng shvla we tvnù mànggá rì kaq svng gvray í shvmán dvgøngā we vtoshì leqlún nøng

Octhadox, Latin shvngømré rì nvng Catholic shvngømré vsvngrì nø Julliyet rø yàng zìda ku tiqni rvtø vdòng taq zubóy svng wá vdu we íe. 
 
Yadø zunbóy làngcha dvpat Svrabín koqkámpè Francis taq kèní shvngbe dvpat vjú vra røtā wegø íe. Shvngbe mvdàm gvray ò shvlawe ìshøt ìgvnrì, dvdamshìwe tvnù mànggá rì tuqgøm lún lvm dvpat vjú røt dvbangā we íe. Yanila mònggvn dvjà taq bønwe mvjàn rì shvngbe laq zømvm nø mòngzøl we jejú laq tuq daq. Dènila mònggvn taq svre dvké we mvjànrì bøn ráì.
 
Yarì svng yv:ngì dvgvp vtang kèní nøt mvbyo lvm vlwe íe. Nøngmaq rvcáng cèrì shvngbe í yadø íwe mvjànrì shvngbe laq zømvm wàì ì nø vjúrøt dvzaq shàì. Gvray dvbùshvng mòngkà vsher lvm tvle shvnat mvzørì tiqni mvdàm tiqni vsher mvnshì ráì we svng yvnglún shì ráì werat vtang shaq nøt yùl lvm vl-e.
 
Ya Yesu Kristu ò Zunbóy nila taq wedø mvjàn rì shvngbe zøm lvm tiqgø vrvm í vjúrøt lvm wàì. Tasvng gvsat kéì we dang rì svng nvr:ì nø dvshà mvhøt vhø:mò vsvngrì dvpvt dvdamā lvm wàì. Shvngbe mvdàm gvray yvng kèní mòngzøl we jejú vtoshì leqlún nøng wanø Svrabín koqkámpè Francis taq kèní vjúrøt dvbangā we íe. 
 
Nøngmaq shvngbe nø tasvng vjúrøt dvbangā kéì nø cømsaq mòngzøl lvm tvrà dvpat dvzaq dvkáng shàì wanø nùngøwn zi kà taqkèní dvtú bøà wegø íe. Móng øpshøl we shølshú vgorì taqkèní gø bvnchvtrì svng wa nøt vyuqì wedø mø:í nø mòngzøl we tvrà svng shóngwám shìwe vsvngrì ò kà svng táā lvm wàì wanø Svrabín koqkámpè Francis taq kèní dvkám nø nùngøwn ziwe íe.