Shv̀nshér vsv̀ngrì wawe nø vpǿ shvring vpǿwe pø̀ zaqshøprì døni rvtø̀ vrv̀m cúnshì we lvpat mvshǿlrì ni íe

Shv̀nshér vsv̀ngrì wawe nø vpǿ shvring vpǿwe pø̀ zaqshøprì døni rvtø̀ vrv̀m cúnshì we lvpat mvshǿlrì ni íe

Shv̀shérwe vsv̀ngrì wawe nø shvngø̀mré vdòng kèní bung longwe vsvngrì ínø̀ àngmaqnø chá vle bø̀ngshv̀ngwe, paqzí lushì shvlawe vsv̀ngrì, kámnøt tvrà taq shvre ri ni wanø Svrabín koqkámpè í dvkám kà shø̀n bǿà wegø íe. Ínìgø yadø dvgùng vlwe dangrì nø yv̀nggùng ngàngdøng nø rvcángcèrì ò lvpvt taq shvkse dvtan lúnwe tvrà ílv́m ràwegø íe wanø Svrabín koqkámpè Francis í dvkám wegø íe. Dàlv́m dø íwe nvmik gømlarì svng gùn dvtøp we tvràrì taq lvjøm lùò we tvràrì taqgø vléshìwe tvràrì mv-vl lv́m wá vduwe dang svng gø dvkám bǿà we íe.

We shv̀nshér vsv̀ngrì wawe nø vtang kèní shvring vdu we pø̀ zaqshøprì døni íe. Àngmaqnø rvtø̀ yv̀nggùng cúnshì lúnwe kadvgvp gø àngmaqò zǿmdàngwe tvrà, bø̀ngshv̀ngwe dangrì nø vmangvmwe mǿ:í. Àngmaqí gv̀l ráà we laqmùrì nø nøngmaq shvngbe dvpvt nøt mvsø̀nrì kaqsvng gálòng èzíì we ínø̀ gvray dvbùshv̀ng mòngkà ò dvgùng svnggø vsv̀ng shvngbe kaq téwa síngshá dvzv́r we nvng dvsháza bv̀nlìrì, lvjøm mv-vl we dangrì, mònggv̀n taq vsv̀ng lvpatrì kadøwa cúnshì vduwe dangrì kaqsvng Svrabín koqkámpè Francis taqkèní dvkám nø dvtú wegø íe.

Yadangrì nvng singnø shvngø̀mré kèní gø kadvgvp ínìgø we Gvray yv́ngkèní tuqrawe vtóng svng gurlv́m mv-vl yv̀nggùn ni cvn dvtøp lv́m íwe dang svng gø vrá dvkám wegø íe.