Shvlawe cv́nshúrì nø vjáshì nø v́lrà we

Shvlawe cv́nshúrì nø vjáshì nø v́lrà we

Shvlawe cv́nshúrì nø vjáshì nø v́lrà we
Kàngpè Yesu Kristu í jøm ciqrì taqkèní vjáshì nø̀ v̀l-lv́m nvng vdèò bv̀nlì døngjá rì svng tøp tøp wa wá dvzaqshì lv́m rvtø̀rì svng vwadø mà dvzø lv́m dvkám wegø íe. 
Àngshø̀n wetaq rvgaq mvdà:mø tasvng nàshòng kénøngnø̀ gálòng svng èzí nøng. Chøm àngkàngpè lorawe rvtø̀ svng vjáshì shaqí ècanøng we vshuqrì nø dvgùng vl longe. Wedø íwe nøt mvsø̀nrì nø Kàngpè Yesu vrá tuqrawe rvtø̀ àngni svng cawe kám vsv̀ngrì ò nøt mvsø̀nrì ni íràe. 
Nøt vjáshì we mv-vl vsv̀ngrì nø dang vrv̀m taq cǿm vnǿn lv́mwa ílonge. Yalòngnø dòngnøt mvsø̀n tiq tvrà dvpvt wa mǿí pvlàcè lvpat dvpvt ni íe. Zìdang tiqlòng taq nøngmaq svng nøt shvyvngshì nø calún lv́m nøngmaq kaq svng dvkám wegø íe. 
Jømciqrì taq nøt mvshèr we cángpè nø àng vlwe chøm kèní àng svng lù:ngò we vhǿm lú:ngòe wa nø yv́ng lún shìe. Pàwálv́m wani chø̀m àngkàng nø àngkaq svng kadángte nøt shvyvngshì nø ca lún lú:ngò we svng yv̀:ngò wegø íe. 
Shvlawe nøt mvsø̀n vlwe yv́ngkèní ngànshà nøt mvsø̀nrì zángshì lv́m lòng svng vtoshì mvdaq long. Ínìgø wedø mvbø̀n daq long wanø gø shǿn mvlún shìwe íe. Nøngmaq tiqgǿ vrv̀m taq nøngmaq í vhǿm bǿshàwe lvpvt mvkrǿm mvdøprì svng vrá dvdam shàì nø dvtøp lv́m gø wàì. Shvlawe tvràrì svng rvcangshàì nø cvndøng lv́m wàì. 
Weratnø̀ nøngmaqò nøt mvsø̀nrì svng kadvgvp gø vjáshì nø v́lrà longe. Vjáshìnø v́llún wenø zitnøt rv́l nøt vlwe gø íe. Wewa mvtaq cipshìwe nøt mvsø̀n ò gømla tiqlong gø íe. Welòng nø rvcángcè rìò vháng vtangwe lvpat cúnshì lúnwe tvrà tiqlòng gø íe.

Add new comment

4 + 0 =