Shvlawe vjúrì vtoshì lúnlv́m dvpvt nvng Gvray tvrà taq apnúngshì we dangrì taq pv̀nyv̀n dvzaq shìlv́m wàì

Shvlawe vjúrì vtoshì lúnlv́m dvpvt nvng Gvray tvrà taq apnúngshì we dangrì taq pv̀nyv̀n dvzaq shìlv́m wàì

Shvlawe vjúrì vtoshì lúnlv́m dvpvt nvng Gvray tvrà taq apnúngshì we dangrì taq pv̀nyv̀n dvzaq shìlv́m wàì
Svrabín koqkámpè Francis taqkèní shvdǿmwe nònggwòn zi mòngkà taq nøngmaq shvngbe nø ni vrv̀mò lvpat taq vjúrøt shàì we dang, shvlawe bv̀nlìrì taq vnvm àngnvm àngchangrì svng apnúng dvbangshì lv́m shvdǿmnø nonggwòn ziwe gø íe.
Kàngpè Yesu nøngmaq kaqsv̀ng dvgùng gùngshv̀ng vlwe dangrì sv̀ng vtánāwe ínìgø mònggv̀n dvrèrì wawe nø tiqni rvtø̀ taq zøvmwe wa íwe dangrì sv̀ng shvdǿm wegø íe. Wedø mònggv̀n yachang tìnnø zøvm we àngni taq nøngmaq shvngbe ò mvràrì sv̀nggø chutchángā lv́m íwe dangrì shǿn vtàn nø kàciq gv̀l ráà wegø íe wanø Svrabín koqkámpè Francis taqkèní gø vrá tiqkvt shvdǿm nø nònggwòn ziwe gø íe. 
Nøngmaq ò dvzaq dvkáng shàì we dangrì taq nøt løp shàì nø wálúnlv́m dang svng gø nònggwòn ziwe íe. Nøngmaq bashàrì taq nøt mvsø̀nrì mvngø̀r mvzø̀l lv́m tvràrì taqkèní lutshì lúnlv́m tvràrì svnggø Yesu kristu í shvdǿm nø̀ kàciq gv́lshaq íwe gø íe. 
Àng dvtut shø̀n wetaq tìn sháò we dvrèrì, kàshvbóng noqngø̀m tø̀ngnø dø íwe noqngø̀m tvrà rìsv̀ng yilshì lv́m, Gvray ò døngmvnwe mòngkàrì nvng àngò shvlawe dvsháza shóngnøt rì svng mvng vtoshì nø cvn dvgøm lv́m dvpvt àngkaq svng noqshàì wanø shvdǿm wegø íe.
Vsv̀ngí vrangshaq íwe noqngø̀m tø̀ngnørì dø íwe mònggv̀n hangrì taqwa dòngnøt kèní vchak èwàò we ínìnø nøngmaqò jón nònggwònrì, vcì vkàng maq yv́ngkèní tuqráì we nøngmaqò tóng laqyàrì , kámnøt tvràrì taq zǿm shvngáng shàì we ínìgø werì mvdàm téwa vchakwe tvrà sv̀ng dǿm sháràwe gø íe. Gvray àng kaqsvng vchak mvdøngku gv́l ràlonge. Kapàsv̀ng èwàò we ínìgø werì shvngbe nø Gvray yv́ngkèní tuqrawe wa ílonge. 
Dvgá dangrì svng vchak èwàò we ínìnø mvdø̀ng vchak long svng shvmáng sháì wegø íe. Wedø mònggv̀n tvràrì shvngbe nø tiqni rvtø̀ taq zøvmwe wa ílonge.
Nøtløpshì nø dvzaq dvkángshìwe nø shvlawe tvràkèní nøngmaqò ni vrv̀m lvpatrì sv̀ng vrang shàì wewa ílonge weratnø̀ shvlawe tvrà kèní Gvray àng kaq tvpní shìnø noqngø̀m lv́m Svrabín koqkámpè taqkèní shvdǿmnø nònggwòn ziwe gø íe.

Add new comment

20 + 0 =