Shvngø̀mré vdòng taq tiqgǿ nvng tiqgǿ tasv̀ng táā kelv́m

Shvngø̀mré vdòng taq tiqgǿ nvng tiqgǿ tasv̀ng táā kelv́m
Shvngø̀mré vdòng taq tiqgǿ nv̀ng tiqgǿ tasv̀ng táā kelv́m nø vchak we tiq tvrà gø íe. Welòng nø nøngmaq dvhø̀ taq zíā kelúnwe vpǿwe gømpaq tiqlòng gø íe. 
Kám vsv̀ngrì taq vnáshì sháì we tvrà nø nøngmaq nø vsv̀ng tiqdárìò nøt mvsø̀nrì sv̀ng táā we Gvray àngò tvrà sv̀ng cvn dvzaq shàì we vsv̀ngrì íshàwe rat Gvray àngdøni vchak wáshàì nø táā kelv́m bv̀nlì døngjá vlì wegø íe. 
Gvray àngò dvbùshvng mòngkà dvshang lv́m dvpvt ratnø 
Gvray àngtaqkèní vsv̀ngrì kaq kadøwa kàtáā we dangrì sv̀ng yv̀ngì nø cvn dvgøm lúnlv́m vchak wegø íe. 
Weratnø kám vsv̀ngrì dvhø taq vchak mvdø̀ng tiqlòng nø nøngmaq dvhø̀ taq tasv̀ng kà táā kelv́m wawe manggá tiqlòng ni íe. Vdèò àngnvm àngchangrì kaqsv̀ng táā lv́m vtiq shàì we ínìnø tiqni rvtø̀ taq Gvray àngkà kaqsv̀ng tálv́m gø vtiq lv́mwa ílonge. 
Gvray bv̀nlì wawe rvtø̀ taq cv́n dvgøm ràwe vchak tiqlòng nø vdèí kashø̀nwe shi mvwáshì we rvtø̀ vzàng tiqdá vsv̀ngò kà táá lv́m nø gvzà vchak we íe. Yaku 1:19 taq ngà shóngshøng we vnvm vchvngrìé, vsvng kagǿ gø tálv́m yv́ng vpán nø, shø̀nlv́m yv́ng nø vtǿn nø, shv̀mná rílv́m yv́ng gø vtǿn rà we sv̀ng leq shánøng. Wanø shvdǿm we sv̀ng yv́nglúnì e. 
Nøngmaq kám vsv̀ng shvngø̀mré vdòng taq tiqgǿ nø tiqgǿ tasv̀ng táā kelv́m dvzaq shàì. Vsv̀ng mv̀ngpòng mvdòrì wawe nø bv̀nlì dvlàrì tiqdang dvpvt cèwa mǿí nø tasv̀ng vpǿnøtí táā kewe yv́ng kèní vrangshìwe gø íe. Tiqgǿ nvng tiqgǿí vhǿ:mì we tvràrì nø màbóngwe íratnø̀ shvngbe dvhø̀ taq vdu vbóng dø wáshì lúnràwe, táā lúnràwe gø íe. 
Wedø vsv̀ng mv̀ngpòng mvdòrì dvhø̀ taqø vdu vbóngdø vl lúnì we ínìnø vnvpwe shvngø̀mré tiqlòng sv̀nggø vrang lúnlv́m ílonge. Wekvt vdè nvng pvlàcè dvpvt gø shvlá vtang jejúrì vtoshì lúnlv́m ílonge.