Shvngømré shølshú rì nø dòngnøt mvsøn shóngnøt rì taqkèní dvbùshvng mòngkà dvshvng yà:ngà wanø Svrabín koqkámpè Francis taq kèní shòlaqré rì svng nonggwøn ziwe

Shvngømré shølshú rì nø dòngnøt mvsøn shóngnøt rì taqkèní dvbùshvng mòngkà dvshvng yà:ngà wanø Svrabín koqkámpè Francis taq kèní shòlaqré rì svng nonggwøn ziwe
           
Nàmaq nø àngnvm àngchangrì kaqsvng vcung lvm dvbù lvm mòngkà rì nvng gvray kaq shvkse wáshì lvm dvpat vrá tiqkvt pvn nàshat nøng wanø Svrabín koqkámpè Francis taq kèní làngré rì svng nonggwøn ziwe íe.
 
Svrabín koqkámpè taqkèní pán nàshat nøng , tasvng mvkok nø nàcùng kénøng wanø dvbùshvng bvnlì nvng singwe nonggwøn ziwe mòngkà vlù vlàngrì kaq zinø dvshat we íe.
 
Àngmaq nø Italy móngdàn kèní ínø Svrabín koqkámpè ò dvbùshvng bvnlì wawe tiq mvdò gø íe.
        
Italy móngdàn kèní làngré rì nø dvbùshvng bvnlì dvpat lìpùngmè tiqlòng washì nø mvngushì bøì wegø íe. We lìpùngmè ò mànggá nø vzàng kaq svng dìì, gvray dvbùshvng bvnlì wawe nø tuqrawe vzàng lvp taqkèní pvngshì we íe wanø íe.

Ya lìpùngmè nø dvbùshvng bvnlì wawe shòlaqré rì dvpat nøt mvcøn kù:nga banā we nvng kù:ngà lushì lúnlvm dvpat gø íe. We mvdò svng poqpvng shì bøì we nø 50 nøng gøm bøì wegø íe.

Rvcáng cèrì shvngbe nø Zunbóy nila dvpat àngdè ò lvpat taq vpø shvring shìnø cúnshì ràwe dang dvkám we gø íe.
 
Shøn mvyø we taq àngdè ò lvpat taq shì yá:ngkèní vrá tiqkvt cúnshì we tiqgø døni wáshì vdu we wáshì ràwe nvng dvbùshvng bvnlì rì taq nøt mvsøn kùngà taqkèní dvzaq shì ràwe dang dvkám we íe. Wedø ínøwa dvbùshvng bvnlì yá:ngkèní tiqdá vsvngrì kaq svng dvbu dvzvŕ lúnwe íe wanø dvkám we íe.

Yalòng nø mòngzøl we tvrà vmangwe lvpat rì yá:ng kèní vrá tiqkvt cúnshì dvzvŕ lúnwe ínø vle vmì we lvpat svng vrá vtáng dvzvŕ we tvrà svng gø roqgvr ā lúnwe íe.
         
Svrabín koqkámpè Francis nø Italy móngdàn taq vlwe dvbùshvng bvnlì wawe vsvng vsvngrì kaq gvray dvbùshvng bvnlì wawe rvtø taq dòngnøt mvcøn taqkèní wá dvzaqshì ràwe íe wedø ínø wa vsvngrì kaq nøtshøm dvbu dvzvŕ e wanø dvkám weí dvtú vtnà we íe.