Sudan móngdàn taq bø̀nbǿì we shvnip shvnvr we tvrà svng mòngzø̀l dø shvrv́m shvrá lv́m dvkám we

Sudan móngdàn taq bø̀nbǿì we shvnip shvnvr we tvrà svng mòngzø̀l dø shvrv́m shvrá lv́m dvkám we

Sudan móngdàn taq bø̀nbǿì we shvnip shvnvr we tvrà svng mòngzø̀l dø shvrv́m shvrá lv́m dvkám we

Shvngkà rìtaq Sudan móngdàn vdòng we móngò pindvp nvng we pindvp svng vtù we (Rapid Support Forces) mvdò dvhø̀ mvjàn bø̀nwe taq vsv̀ng gorø (100) rvzé gǿ nvng vsvng àngkíng rvzé gǿ dv:má lún bǿà we yv́ng lúnshìe.

We pindvp 2 mvdò dvhø̀ vzi vrùng wawe nø we móng døngtáng svng vsher á:mì wegø íe. We dang nvng singnø Svrabín koqkámpè Francis taqkèní damzúshì we, tvle tepkewe dø mǿí nø mòngzø̀l we tvrà taq shvrám shvrá shìlv́m dvkám nø dvtú bǿà wegø íe.

Khartoum rvgaq taq bø̀nwe mvjàn rìrat mvjàn yølshì vdu bǿì we móng vsv̀ngrì tiqni mvdàm tiqni luq mvnshì ráì. Weratnø American nvng England móngdàn rì taq vlwe we móngdàn ò krønmvn gvsarì kaqsvng wedø mvjànrì rat shvlo ò we gø wàbǿà we íe.

Wewa mvtaq Spain, Italy, France, Germany nvng dvgá móngdàn rì taq vlwe àngmaq ò móngdàn krønmvn gvsari svng gø shvlo lv́m dvgǿ shìbǿì wanøgø shálún shìe. American móngdàn kèní gø we Sudan móngdàn vdòng taq vdǿn kéò we àngmaq ò móng vsv̀ng rì shvngbe svng wemóng kèní nv̀mbø̀n shø̀ tvrà ku lu bǿà wegø íe.

American móngdàn gv̀mzø̀ koqkámpè Joe Biden kèní gø wemóng (2) móng ò mvjàn rì svng cvn cvn nvr lv́m dvtú kàru shvlang bǿà wegø íe. Wedø naqciqriq we mvjànrì dvbu:ngò we vdòng mvrà mv-vl we móng vsvng rì lvpat zíshì rawe gø gvzà vlwe nvng we dangrì svng cvn cvn nvr lv́m, we tvrà nø síngsháā kelv́m tvrà tiqlòng gø mǿí we dang dvkám bǿà we íe.

Wedø mvjàn dvbungò we pindvp (2) mvdò kaq svngpv̀n dvsháza bv̀nlìrì taq vréshì we mvwàlv́m, móng vsv̀ngrì ò kà shaqrì svng vpǿā lv́m dvtú nø dvkám bǿà wegø íe. Wemóng vsvngrì tiqmaq svng gø móngdàn vtáng svng shvlut nø dvgá móngrì kaq sháò we bv̀nlì rì høqshaq wá vdu bǿì we gø íe.

Africa, Asia nvng rvwè Asia móngrì kèní we Sudan móng vdòng taq paqzí cvnshì we vsv̀ngrì gø Khartoum myuq taq vdǿn ke bǿà. Khartoum myuq nø vsv̀ng gorø (6) sé sèn rvzé gø vlwe wamà tiqlòng gø íe. Yani la vdòng we shvràrì taq Internet line rì gø vmvng we ínø vtoq vtip lv́m tvràrì, sv̀ngpv̀n dvsháza bv̀nlìrì taq gvzà yakwe shìwvtrì vhǿmò wegø íe.

Mònggv̀n shiqshv̀n ràlàng dvpkèní dvtú we taq vsv̀ng gorø (400) rvzégǿ lvpatrì shì bǿì we nvng mvjàn rat da:má lúnòwe vsv̀ngrì gø gvzà vl bǿì. We vsvngrì shvngbe nø cì lvjáng shìlv́m vko vkángrì mvlúnò we rì bø̀ne wanø dvtú bǿà.

Mònggv̀n rvpdoq UN kèní gø svmaré rì nvng cv̀mrérì (20000) gǿ svng Sudan móngkèní shømlømwe wamà tiqlòng íwe Chad wamà svng lùò nø gv̀l bǿà wegø íe. Chad wamà nø Darfur wamà ò shvnvng taq vlwe wamà tiq wamà gø íe.

Add new comment

8 + 9 =