Svrabín koqkámpè ò zaqlè tvrà dvpvt Mogolia shvngø̀mré vsv̀ngrì taqkèní shaq shaq wa vtowe

Svrabín koqkámpè ò zaqlè tvrà dvpvt Mogolia shvngø̀mré vsv̀ngrì taqkèní shaq shaq wa vtowe
Svrabín koqkámpè Francis nø gvzà màlé we rvtø̀ taq Asia dan taq vlwe móngdàn tiqmóng dàn kaq zaqlè tvrà dìlv́m dvgǿ shì bǿì wegø íe. Yadang nvng singnø vrìng bǿà we gø rvtø̀ mvme vlé ráì. We zaqlè tvrà nvng singnø̀ Mogolia kèní Cardinal Giorgio Marengo í dvtùng bǿà wegø íe. 
Svrabín koqkámpè Francis nø Mogolia móngdàn svng August 31 ni taq zaqlè tvrà bú:ngvm we ínø̀ September 4 ni høqshaq we móng taq vl lv́m íwe dang vtàn bǿà. Mongolia móngdàn kèní shvngø̀mré vsv̀ngrì gø we dø Svrabín koqkámpè tuqlv́m tvrà svng dvbu nøt kèní vto nø cashì we dang dang vrvm kèní tvlú dvgǿshì shaq íbǿì wedang ya dø Svrabín koqkámpè ò zaqlè tvrà nø vtang kèní dvgùng vlwe nvng ìshøt tiqlòng ni íwe dang Vatican shvngkà dvp kèní gø dvtú bǿà we íe. 
Mongolia móngdàn nø Vatican nvng vto vtip we tvrà svng 13 àngyá mvzuq nǿng Svrabín koqkámpè Innocent IV nø Franciscan shvrúng shú John of Plano Carpini svng vtoq vtip lv́m krøn mvn gvsa ku dang yv̀ngà we yv́ngkèní pv́ngshì ráì wegø íe. 
Svrabín koqkámpè Francis nø ya lòng zaqlè tvrà nvng singnø̀ àng mvtú nø “Hoping Together” wawe tiqdø vzø̀m vzvp tvrà svng dvdam shì we dang vrìng bǿà we íe. 
Ya lòng Mongolia móngdàn zaqlè tvrà svng nø móngøp gv̀mzø̀ rì taqkèní gø àngkaq svng go we rvt dí vdu we dang svng gø vtànvt nà. Yalòng zaqlè tvrà nø mvluq mvtàm we Mongolia dvcì, shvngø̀mré rì kaqsvng nònggwòn kù:ngà zíshì we zaqlè tvrà gø íwe dang vtàn bǿà. 
Mongolia móngdàn ò dvcì vtóng laqyà rì nvng àngmaq ò màbóng we kámnøt tvrà rì kaqsvng gø yv́nglún, cvnshì lúnlv́m tvrà tiqlòng íwe rvt wedang rì nvng singnø tasvng vzø̀m vzvp lv́m, vtoq vtip lv́m manggá kèní we móng kaqsvng vriq lv́m Svrabín koqkámpè kaq móng øp gv̀mzø̀ rì kèní go we íe wanø gø shálún shìe.