Svrabín koqkámpè Francis ò á:m-vq vnvtshì we rvtø̀ lvngcha dvpvt lvp kà

Svrabín koqkámpè Francis ò á:m-vq vnvtshì we rvtø̀ lvngcha dvpvt lvp kà

Shóngshø̀ngwe vnvm vchang maq, Mati, Mako nvng Luka dø íwe dvbùshvng vru shú àngmaq vshø̀m gǿ taqkèní Yesu Kristu ò mv́r shø̀ngshvng vmvtshì we dang vru yv̀ngà. We dang nvng singnø̀ Yesuí àng dang shvláwa mvsíng sháò we àngmaq kaqsv̀ng vtànò we tvrà svng gø nøngmaq shvngbe taqkèní shálúnì wegø íe.

Mati 16:23 Inìgø A:ngí lè nø wv́l poshì nø Piter svng, “Satané! Ngà mèpvng kaq èyilshi, Nà nø Ngà dvpvt vtøprà èíe. Nàí dèda:mò we nø Gvray nøtnó màrá, vsvng lap kèní wa dèda:mòe,” a:lòe. Mati 17:1 Vchuq ni mèpvng Yesu nø Piter, Yaku nvng angnv̄m pè Yohan shø:lò nø, vháng we shìgùng svng angmaq wawa rvlv̀ngá:mì. Wanø vru yv̀ngà we dang yv́nglún shìe.

Yesu Kristu àngò mv́r shø̀ngshvng vmvtshì we rvtø̀ lvngcha íwe ám-vq vnvtshì we rvtø̀ 2 lvbán døp taq we mòngkà ciqrì kaqsvng rø vdu wegø íe. Nøngmaq shvngbe ò ni vrv̀m cúnshàì we lv́pvtrì nø vlíng vpowe tvrà mǿí nø toni døni vlì we íe. Tiqkvt kvt vzing shàì we rvtø̀rì vl longe. Wervtnø̀ Yesu kristuí nøngmaq shvngbe svng we ám-vq vnvtshì we rvtø̀ taq vháng vtangwe shìgùng svng ègoì wegø íe. We shvrà taq nøngmaq shvngbe ò pvlàcè dang kùngà lushì lv́m dvpvt gø íe.

Ám-vq vnvtshì we rvtø̀ lvngcha nø nøngmaq shvngbe ò pvlàcè dang kùngà lushì lúnlv́m dvpvt gø íe. Yesu Kristu ò wurgáng tvrà taq cv̀nnø̀ jór nònggwònrì vtoshì lúnlv́m dvpvt gø íe.

Yesu kristuò tvrà svng síngshá lúnlv́m dvpvt, chutcháng we tvrà svng vtoshì lúnlv́m dvpvt nø àngò shóngnøt tvrà taq nøngmaq tiqgóng shvngbe àngkaq svng zíshì lv́m, àngí dvtúwe tvrà taq cvn dvgømlv́m nvng mvdøngwe tvrà rì svng gur lv́m dvpvt gø íe.

Nøngmaq nø we tvrà svng nònggwòn kùngà dvzaq dvkángshì lv́m gø rà vchvk we íe. Yanila ò rvtø̀ lvngcha taq nøngmaq shvngbe ò pvlàcè dang nònggwòn kùngàrì lushì lv́m nvng Synod lìpùngmè ò tvrà svng cv́n dvgøm dvtøpshì lv́m gø rà vchvk we íe.

Yesu nø Dabo shìgùng mvdàm kèní yøtshì ráì wekvt dvzv́r rì 3 gǿ kaqsvng màbóng we dvjà kèní rvcangshì dvzv́rò wegø íe. Wedø jejú gømpaqrì svng tiqdá vsvngrì kaq gø dvtit tvle dvzv́r wegø íe.

Mati 17:2 wekvt angmaq mv́rdv̀ngø àng nø shø̀ngshv̄ng tiq mv̀rshv̀m vmvtná:mì nø, àng mv́r nø nv̀m dø shór lú:ngì. Àng bèlaq rì gø gálòng døni mùngá:mì. Wawe jømciq nø àng lvjøm vlwe dang vtàn we ínø̀ yani la taq dvtøp shì shvla we jømciq tiqlòng gø íe. Wedø gálòng nø dvgá shø̀nggv̀n kèní mǿí nø Yesu àngò góng kèní shórwe gø íe. Wedø dalv́m dø íwe nvmik gømlarì svng dvzv́r rì taqkèní chvpdvp vhǿ:mò nø yv́nglún yv̀:ngà wegø íe.

Wedø ni Synod wawe tiqdø zaqlè tvrà svng vzø̀mnø̀ dìlv́m tvrà taqø gø yvklv́m shìwvtrì àngpv̀n pv̀n vkǿn longe. We tvrà taq manggá tiqlòng sv̀ng dvda:mì nø dvzaq dvkáng shàì taqsórí dì lv́m wàì wanø̀ vtàn bǿà we íe.