Svrabín koqkámpè Francis ò (43) boq waboq dvbùshvng zaqlè tvrà Mongolia móngdàn svng tuq bǿì we

Svrabín koqkámpè Francis ò (43) boq waboq dvbùshvng zaqlè tvrà Mongolia móngdàn svng tuq bǿì we

Svrabín koqkámpè Francis nø àngò lvpat vsvk téráì we ínìgø yadø zaqlè tvrà yvnggúng svng dí dvzaqshì mvbat ni íe. Àngnø September 2 ni taqni àng laqni tuq mvyǿ we Mongolia móngdàn Chinggis Khaan nv̀mbø̀ng shø̀ tø̀m svng tuqá:mì.

Mongolia móngdàn ò Svrabín gvsa pè Msgr. Fernando Duarte Barros Reisi, Mongolia móngdàn ò krønmvn gvsa Davaasuren Gerelmaa maq taqkèní we nv̀mbø̀ng shø̀ tø̀m taq shaq shaqwa vto bǿà wegø íe. We shvrà taq shvngø̀mré nvng móng shaqré rì nvng gø vhøm nø dvmv̀n bǿì wegø íe.

Mongolia móngdàn ò Svrabín gvsapè Msgr. Fernando Duarte Barros Reis, Mongolia móngdàn ò krønmvn gvsa Davaasuren Gerelmaa maq nvng vhøm bǿì mèpvng we mèpvng ni taq we móngdàn ò vsúyaq shølshú shaqré rì nvng gø vhømnø dvmv̀n bǿì.

Àngnø̀ we móng taq vlwe kám vsv̀ngrì nvng kám vsv̀ng mǿí we vsv̀ngrì nvng vhømnø̀ dvmvn bǿì we ínø̀ kám vsv̀ngrì kaq gø Gvray dvbùshvng mòngkà kèní nònggwòn zinø̀ dvshvt we wáshaì bǿì wegø íe.

September 4 ni taq nø “the House of Mercy” wawe tø̀ngnø svng poqpvng we lvmvng tvyø svng wáshì bǿì mèpvng shìwà vsv̀ngrì shvngbe kaq pàmvrà wa só:rí Italy móngdàn svng vrá tiqkvt bú:ngámì wegø íe.

Mongolia móngdàn nø rvwe Asia móngdàn tiqmóngdàn gø ínø̀ Mìwà móng nvng Russia móngdàn rì nvng rvgaq dvrøt we móng gø íe. Mongolia móngdàn nø móng vsv̀ng gorø (3.3) sésèn rvzé gǿ wa vlwe móngdàn tiq móngdàn gø íe.

Mongolia móngdàn nø 1921 nǿng taq Mìwà móngdàn kèní shvnglut shì ráì we nvng Russia móngdàn kèní øpkáng ò we tiqmóngdàn gø íe.

Wedø íwe dvjà kèní dèni bat taq nø Socialist Democratic Party tiqmvdò taqkèní móng lvmvng svng vlíng vpo ráà we tiqmóng dàn gø íráì.

Móngdàn vdòng taq shvngø̀mré rì ò shvnglut we vko vkángrì gø 1991 nǿng mèpvng kaq svngwa vl ráì we tiqmóng gø íe. We móng ò mvdø̀ng noqshì we vtóng nø Budda tvrà kèní noqshì we vtóng vl we gø íe.

Catholic Sasvna svng nø 1992 nǿng kèní gòng ráì nø dèni rvtø̀ taq nø Italy dvcì Mongolia Catholic Sasvna ò Cardinal Giorgio Marengo taqkèní shvngø̀mré vsv̀ng 1500 gǿ svng shøl nø vl we gø íe.