Svrabín koqkámpè Francis ò dvtú kà

Svrabín koqkámpè Francis ò dvtú kà

Vsv̀ng lvpat wawe nø rvtø̀ tiqlangcè vdòng taqni bevme. Vsvngrì nvng mènàshvtni, vdè góng vdè gø yv́ng mvtv̀mvm we mèwáshìni, gvzàgø mènàzingshìni.

Mònggv̀n pø̀ gv̀msùngrì tvrà taqkèní wagø yøp mèdè gv́r shìni. Nà tiqgǿ svng nøt shvlø̀m we vsv̀ngrì kaq èláò. Vléshìvm we tvrà rì svng nøt nàwángshì nø welòng svng nàná ò. Nøtshø̀m lv́m tvrà rì svng èláò.

Àngpè àngmè shvlá tiqgǿ dø ècúnshì. Dø̀ngku vdòng mònggv̀n dvrè rì dvpvt wa nøt mèdè bunshìni, chø̀m vsv̀ngrì dvpvt zaqshøprì gv́lā lv́m tvrà nvng singnø̀ nøt mèdè cv́mshìni. Vsv̀ng wawe nø tiqgǿ vrv̀m taq vdè nø vdè dvzaqshì ràwe wa ni íe. Wervtnø̀ pø̀ zaqshøp rì nvng mònggv̀n dvrè rì lá vshøp lv́m tvrà taqwa rvtø̀ mèdè zøni, jejú ìshøt rì mv̀ng ènvngshì.

Byo byo cè èvl, zaqlè wàng tvrà rì dìì nø̀ nøt shvlǿm shàì. Shvrà àngshv́r rì svng lashàì. Vdè nvng vdu vbóng nø̀ lún vpǿwe mòngzø̀l lv́m tvrà rì svng vtoshì lúnlv́m dvzaq shàì. Nìnà rì svng shóngnøt èzíshì, mònggv̀n dvrèrì svng vnvp lv́m tvrà dvpvt wa mènv́ngni, dørø̀m ámpà jv̀m dvpvt we shvlá vtang íwe gwìn chv̀ng svng èlvngshì, nà í èshò:ngò we ngór docì svng gø láng mèrè gøtni, shagóng mvnshì lv́m tvrà taq hí shvnvm shvla lòng svng èlvngshì. Nà shóngshì vtang íwe gónggwá rì svng ègwa shì.

Yadø íwe shvla we dangrì svng èshóngshì. Chvpdvp taqgø èwàò. Yaqdø̀ng yøp rvtø̀ svng mècā shìni, vkvt ni Gvray kaq vjú èrøt shì, tiqdá vsv̀ngrì kaq mvrà chutā nø̀ Christmas rvtø̀ svng cawe, nár ni svng cawe, vhøm lv́m àngni rì svng cawe, nǿngshv́r àngni svng cawe nvng vdè lvpat tvrà taq kø̀mzøp lv́m rvtø̀ svng cawe wáshìe.

Ínìgø lvpat taq shvngbe kø̀mzøpme wawe nø mvl dvr. Pàwálv́m wani rvgaq mvdàm taq vsv̀ng lvpat kø̀mzøpme wawe nø mvl dvr yadangrì shvngbe taqkèní cvnshì lv́m wa ílonge.

Wervtnø̀ lvpat taq wáràwe tvrà rì svng wá dvzaqshì lv́m nvng tasv̀ng shóngnøt vzí kelv́m nvng dang vrv̀m kaqsvng Gvray wur taq zíshì lv́m wáshàì.