Svrabín koqkámpè Francis ò February shvlá dvpvt vjúrøt lv́m manggá vrìng kàru

Svrabín koqkámpè Francis ò February shvlá dvpvt vjúrøt lv́m manggá vrìng kàru

Svrabín koqkámpè Francis ò February shvlá dvpvt vjúrøt lv́m manggá nø "yóga dvjáng í vtøp kéò nø làngdø̀m rvtø̀ taq vl we vsv̀ngrì dvpvt" íe.

Yóga dvjáng rìí vtøp kéò nø̀ làngdø̀m rvtø̀ taq v́l vdu we vsv̀ngrì lvpat svng yv̀:vtnì dvgvp cì lvjáng mvlúnshì we vsv̀ngrì nvng àngmaq svng gùn lvjàng mvlú:nì we vsv̀ngrì dang wanø̀ vní dang kèní yv́:nglún ìe.

Yóga zø̀mlv́m yakwe dvjà taq ínìgø vsv̀ng shvngbe taq cì lvjáng shìlv́m vko vkáng rì mv̀ngnø rìn vrá vkáng vl we ínø̀ svngpv̀n dvsháza shóngnøt nvng pvlàcè dang, nøt shvlø̀m we tvrà kèní tubùm āràwe gø íe.

Tiqkvt kvt àngmaq taqkèní kà shǿn mvlún:ò we nvng vsv̀ngrì svng gø màmvshv́l:ò we rvtø̀ rì vl longe.

Wedø íwe rvtø̀ rìtaq àngmaq ò wur svng zø̀mnø̀ nøt shvlǿmā we tvrà nø àngmaq kaqsvng shvla dø cì lvjángā we tvrà tiqlòng gø íe.

Àngmaq kaq svng wedø mvkok ràwe dang svng St. John Paul (II) taqkèní gø dvkám ráà we íe. Wedø mvkok we tvrà nø Palliative Care wawe yóga svng cǿm dvzv́r we tvrà tiqlòng gø íe wae. We dø wáshì we tvrà nø àngmaq kaq svng cì lvjángā we tvrà íwe mvtaq sv̀ngpv̀n dvsháza we tvrà gø íe wanø̀ vtàn ráà we íe.

Yakwe shìwvt rì vkǿn rawe rvtø̀ rì taq dø̀ngku vsv̀ng rì svng téwa mvkokā ràlonge. Àngmaqò làngdø̀m rvtø̀ rìtaq nøt mvsø̀n, shagóng nvng pvlàcè dang nøt shvlø̀m lv́m rà vchvk wegø íe. Àngmaq dvpvt rvtø̀ vrv̀m gø vjúrøt dvbangā lv́m wàì wanø̀ Svrabín koqkámpè Francis taqkèní dvkám wegø íe.