Svrabín koqkámpè Francis Mongolia móngdàn svng zaqlèwàng dìlv́m íwe shv̀ngkà

Svrabín koqkámpè Francis Mongolia móngdàn svng zaqlèwàng dìlv́m íwe shv̀ngkà

Svrabín koqkámpè Francis Mongolia móngdàn svng zaqlèwàng dìlv́m íwe shv̀ngkà

Svrabín koqkámpè Francis nø yanila taq Mongolia móngdàn svng zaqlèwàng dìlv́m dvgǿshì wegø íe. Mongolia móngdàn nø mònggv̀n taq vsv̀ngrìí gvzà mvsháò we gàmzø̀ koqkám taqkèní øpwe móng tiq móng gø íe. We móng svng Svrabín koqkámpè Francis nø tuqrawe May shvlá vdòng Hangary nvng France móngdàn rì kaq zaqlè tvrà kèní lorawe rvtø dvtut nganvm we svng shálún shìe.

Gvray dvbùshvng bv̀nlì taq Svrabín koqkámpè Francis nø àngò zaqlè tvrà (41) boq waboq Italy móng kèní dvgá móngdàn svng zaqlè tvrà dì lv́m dvgǿ shì wegø íe. We mèpvng France móngdàn Marseille, Mongolia móngdàn rìsvng (ITA) Italy móngò nv̀mbø̀ngshø̀ tvrà kèní dìlv́m íwe dang April shvlá 14 ni taq dvtú bǿà.

Mongolia móng svng divm we zaqlè tvrà nø Svrabín koqkámrì ò àng bat bat taqkèní nv̀mlat tuqvm we Svrabín koqkámpè ílongwe gø íe.

Mongolia móngdàn nø mile (2880) gwaqwe móng tiqmóng gø ínø miwa móng nvng dvrøt weí we móng nvng wulaq tvrà kèní vzø̀m nø vtoq vtip we móng gø íe. We móngò móng vsv̀ng gorø (3) sé sèn gǿ vlwe taq Catholic shvngø̀mré vsvng (1300) gǿ vlwe móngdàn tiqmóngdàn gø íe. Wemóng svng Sasvna bv̀nlì nv̀mlat gòng ráì we nø 1922 nǿng taq the immaculate heart of Mary’ mvdò kèní pv̀ng ráà wegø íe.

Webat taq Communist móng lvmangrì rat kám vsv̀ngrì kaq vtang kèní shvnip shvnvr weí Sasvna bv̀nlì rì taq gvzà yakwe tiqmóng gø íyv̀ngì. Mongolia móngdàn kèní nv̀mlat shvrúngshú svng 2016 nǿng taq vtoshì lún ráà wegø íe.

Sasvna bv̀nlì taq 20 nǿng vl bǿì mèpvng Italy móng vsvng shvrúngshú Fr. Giorgio Marengo kaq wemóng ò Cardinal ku dangā ráà wegø íe. Cardinal nø vsvk (48) nǿng wa íwe gø íe.

Mongolia móngdàn nø Russa móngdàn nvng gø dvrøtwe tiqmóng ínø̀ mònggv̀n taq móng vsv̀ng mvluqwe móng tiqmóng gø íe. We Móng nø Gobi zishèr tø̀m ò 3 wv́l tiq wv́l vbáwe móng gø íe.

 

2023 nǿng vdòng Svrabín koqkámpè dvbùshvng bv̀nlì kèní zaqlè dìlv́m íwe móngdànrì

Svrabín koqkámpè Francis nø 2023 nǿng vdòng zaqlè dìvm we móng rì taq Hangery móngdàn Budapest svng ya shvlá vdòng dìlv́m dvgǿ shìwe íe.

Wemèpvng August shvlá 1-6 ni dvhø̀ Portugal móngdàn taq wàlv́m íwe mònggv̀n zìlàngré àngni svng ngangvme.

France móngdàn, Marseille kaq September shvlá 23 ni taq tuqvm we ínø̀ weyv́ng kèní tìnúng mvshé dung taq vlwe Svradorì àngké mvdò ò lìpùngmè svng dìlv́m íwe dang shálún shìe. Welòng mèpvng nø Svrabín koqkámpè Francis Mongolia móngdàn svng zaqlè tvrà dìlv́m ínø India móng svng gø gòng lv́m íwe dang, India móng ò Wunjí chukpè Narendra Modi kèní gowe íwe dang vrìng bǿà.

Add new comment

2 + 6 =