Svrabín koqkámpè Francis nø Lisbon taq wàbǿà we mònggv̀n zìlàngré àngni tvyø taq zìlàngrérì shvngbe dvpvt màsvre lv́m tvrà wawe mòngkà kèní dvshvngnø nònggwòn ziwe

Svrabín koqkámpè Francis nø Lisbon taq wàbǿà we mònggv̀n zìlàngré àngni tvyø taq zìlàngrérì shvngbe dvpvt màsvre lv́m tvrà wawe mòngkà kèní dvshvngnø nònggwòn zíbǿà we

Mònggv̀n zìlàngré àngni svng August 1-6 ni dvhø̀ mòngzø̀l dø wálún bǿà wegø íe. We bóy tvyø lvmv̀ng svng kø̀mngǿm ráì we mònggv̀n móngdàn vràm kèní zìlàngré rì nø Lisbon myuq svng tuqráì nø vhøm bǿì wegø íe. We bóy tvyø svng Svrabín koqkámpè Francis gø August 2 ni taq tuqráì nø August 6 ni taq Roma svng lo bǿì nø Portugal móngdàn taq 5 ni høqshaq rúng bǿì we íe.

Svrabín koqkámpè nø we 5 ni dvhø̀ taq mònggv̀n dø̀ng svng dvtú we mòngkàrì kèní zìlàngré rì, móngøp gàmzø̀rì, Svrado rì, shagóng mvshiq mvshàn vhǿmò we vsv̀ngrì nvng dvgá vsv̀ng mv̀ngpòng mvdòrì dvpvt dvtú mòngkà dvshvng bǿà wegø íe.

Svrabín koqkámpè taqkèní Portugal móngdàn svng nv̀mlat tuqráì we rvtø̀ vtowe lvmvng tvyø taq “ nv̀mløp móngdàn rì vdèò nv̀mlat mvpv́ng ò dvpǿrì svng vrá dvdam dvtøp shàì wanø dvtú bǿà wegø íe.

Portugal móngdàn nø Gvray kaq kámwe móngzø̀ng cèrì mvlúngka vlwe móng íwe taq Svrabín koqkámpè taqkèní Catholic Svrado rì, Shvrúng shú rì, dvzømshú rì, dvbùshvng bv̀nlì wawe vsvngrì kaq Gvray dvbùshvng mòngkà dvsher we bv̀nì rì taq dvzaq dvkángshì lv́m, mònggv̀n laqyàrì dang taq nøt vyuqwe tvrà svng yilshì lv́m nvng Gvray jejú kaqsvng dvgùng shvring nø oqà wáshá lv́m dang dvtú nø nònggwòn zíbǿà we íe.

We mèpvng Svrabín koqkámpè taqkèní Mà svre lám tvrà wawe kà vgo kèní gø dvtú bǿà we íe. Shvla nø nøt mvsø̀n shèr we Samaritan dø wáshì nø̀ shvlawe bv̀nlìrì wawe taqkèní vzàng lvp svng dìlv́m, svrenøt ò bàngzì lv̀mpvngø wa èvl we yv́ngkèní nøt mvsøn shvla dø gálòng svng vpo lúnlv́m dang dvtú bǿà we íe.

We mòngkà rì svng Svrabín koqkámpè Francis taqkèní mònggv̀n zìlàngré àngni svng kø̀mngǿm ráì we shìwà vsvng 1000000 rvzé gǿ kaqsvng dvtú nø we shvngø̀mré nø mònggv̀n shvrà vrv̀m taq vlwe ínø vdè èvl we shvrà rì taq chvpdvp bv̀nlì rì taqkèní wá dvzaqshì lúnlv́m svng gø lvpshì we íe.

Svrabín koqkámpè taqkèní zìlàngré rì gǿ vrv̀m kaq svng mè sère nøngni wanø gø dvtú nø nònggwòn zí bǿà we íe.

Àngò mòngkà rì nø we bóy tvyø svng tuq ráì we zìlàngré, shaqré rérì tiqgǿ vrv̀m kaqsvng døngmvnwe tvrà taqkèní Gvray dvbùshvng mòngkà dvsher we bv̀nlì wawe rvtø̀ taq mà svre lv́m, vzàng kaq shvngø̀mré dvpvt nvng mònggv̀n taq tvle mvlúnshì we dvlàrì svng tvpshì lúnlv́m dang rì kèní nònggwòn zi mòngkà dvtú bǿà wegø íe.