Svrabín koqkámpè Francis nø mònggvn dvshá mvhoq vsvngrì ò àngni taq jøng jøng ni dvshá mvhoq vsvngrì 500 gø nvng we lìpùngmè àngni svng wàlvm íwe.

Svrabín koqkámpè Francis nø mònggvn dvshá mvhoq vsvngrì ò àngni taq jøng jøng ni dvshá mvhoq vsvngrì 500 gø nvng we lìpùngmè àngni svng wàlvm íwe.

  Tuqrawe November 12 ni taqnø mònggvn dvshá mvhoq vsvngrì ò àngni ínø weni taq jøng jøng ni mònggvn taq dvshá mvhoq vhøm:ò we vsvngrì 500 gø nvng Assisi wamà taq wàlvm dvgø shì bøì we íe.

 Yani svng vle vmì we 5 nøng taq Svrabín koqkámpè taqkèní mvsat shì bøì wegø íe. Yanøng vdòng taqnø November 12 ni taq wá vdu ráì wegø íe. Svrabín koqkámpè Francis nø weni ò vzàng kaq 2 ni wani taq dvshá mvhoq vsvngrì nvng vhøm nø mvngushì lvm íwe svng shálún shìe.

   Weni ò tvnù mànggá nø dvshá mvhoq vsvngrì nvng tiqnøt tiq mvyùng íshàe wawe íe. 

September shvlá nø Mother Teresa sisters mvdòrì wanø tøshì we dvsháza shóngnøt bvnlì wawe mvdò rìkaq svng gø dinø vhøm we wáshì we íe.

  Gvray í nø nømaq svng roqgvr íwe dø tiqdvchá nøngmaq shvnv:ngø vlwe íe. Téwa dvshà mvhøt lvm vhøm shì rawe rvtø taq yadang svng dømshá rà longe.

   Svrabín koqkámpè Francis nø Europe móngdànrì taq vlwe vsvngrì nvng vhøm lvm dvgø shì wegø íe. Àngmaqò shønwe kàrì svng táā lvm dvgø shì we gø íe. Àngmaq kaq rvtø zíshì nø vjúrøtā lvm íwe svng shálún shìe. Svrabín koqkámpè Francis yadø Assisi wamà svng di we nø 5 boq wa boq íráì wegø íe.
 
   We wamà svng làngdøm boq diwe nø 2020 October 3 ni taq ‘Fratelli tutti’ wa tøshì we kàru taq wurmvr shvmvr shì lvm svng di we íe. Yanøng ò lìpùngmè svng nø byindit móngdàn kèní Fratello tøò we mvdò kèní bvnlì àngkàng wáshì lvm íwe svng shálún shìe.

 Fratello wawe nø Italian kàpvn kèní vnvm vchang rì wanø lvjøm lúnshì we íe. We mvdò nø dvshá mvhoq vsvngrì kaq tubùm dvbangā we mvdò tiq mvdò ínø mònggvn shvrà vrvm yá:ngø vlwe mvdò gø íe. Yanøng taq wá vdu we mònggvn dvshá mvhoq vsvngrì ò àngni taq nø mònggvn móngdàn vrvm kèní we vsvngrì 15 svng Svrabín koqkámpè Francis nvng vhøm dvzvŕ lvm íwe svng shálún shìe.